31 қаңтар күні Cтепногорск қаласының Полиция басқармасының жанынан Қазақстандағы алғашқы жеке әкімшілік ғимаратта орналасқан «Жедел басқару орталығы» (ЖБО) ресми түрде ашылды, деп хабарлайды altynqala.kz тілшісі.
Мұндай қадам құқық қорғау органдарының тиімділігін арттыруға, қоғамдағы тыныштық пен тәртіпті сақтауға үлес қосатын маңызды шара болып табылады. Жаңа тәсілдер мен технологиялардың қолданылуы полиция қызметкерлерінің әрекет ету жылдамдығын арттырып, қылмысқа қарсы күресті күшейтуге жағдай жасайды.
Шараға қала әкімінің орынбасары Жанасыл Сабырұлы, қалалық мәслихат төрағасы Олжас Жағыпаров, Ақмола облысы полиция департаментінің басшысы Нұрсұлтан Мұқашев, қалалық Полиция басқармасының басшысы және қалалық прокуратура басшысы қатысты.
Қала әкімінің орынбасары «Жедел басқару орталығы» ашылу рәсімінде құттықтау сөзін сөйлеп, осы жобаның маңыздылығын ерекше атап өтті. «Бүгін – біз үшін маңызды әрі ерекше күн. Қаламызда Республика бойынша, жалпы облыс бойынша алғаш рет жеке орналасқан «Жедел басқару орталығы» ашылып отыр. Бұл қадам құқық қорғау саласындағы жаңа кезеңнің бастауы болып табылады және қоғамдық қауіпсіздікті нығайтуға бағытталған үлкен шара», деді ол.
ЖБО заманауи бейне бақылау жүйесімен, құқық бұзушылықтарды тіркеуге арналған арнайы бағдарламасымен жабдықталған және «102» жедел желісінің автоматтандырылған станциясымен қамтамасыз етілген. Орталықта 6 жаңа бейнебақылау камерасы орнатылып, ЖБО мониторына 148 камера қосылған. Бұл камералардың 139-ы қала аумағында, 4-і Қарабұлақ ауылында, 5-і Ақсу кентінде орналасқан. Ғимаратта жаңарту жұмыстары жүргізіліп, қызметкерлер үшін қолайлы жұмыс жағдайлары жасалған. Жедел басқару орталығының ашылуы полицияның әрекет ету жылдамдығын арттырып, қоғамдық тәртіпті бақылауды нығайтуға мүмкіндік туғызады.
