Фото: https://www.instagram.com/stepnogorsk_qalasynyn_akimdigi/ парақшасынан алынды.
Степногорск қаласында 26 ақпан күні жастарды еңбек нарығына бейімдеуге бағытталған маңызды кездесу өтті. Жоғары колледжде қала әкімінің орынбасары Жаңасыл Сабырұлы студенттермен жүздесіп, олардың болашақ мамандықтары бойынша жұмысқа орналасуына байланысты өзекті мәселелерді талқылады.
Кездесу барысында техникалық және кәсіптік білім беру (ТжКБ) ұйымдарының студенттеріне кәсіби бағдар беру, жұмысқа орналасу мүмкіндіктері мен қаладағы ірі кәсіпорындардағы бос жұмыс орындары туралы ақпарат ұсынылды. Жаңасыл Сабырұлы колледж студенттерімен ашық сұхбаттасып, олардың еңбек нарығына бейімделуіне көмектесетін маңызды аспектілерді атап өтті.
Ол қаладағы ірі кәсіпорындарда бос жұмыс орындарының бар екендігін, олардың қай салаларда шоғырланғанын және бұл мүмкіндіктерді қалай тиімді пайдалануға болатынын айтты. Сонымен қатар Степногорск қаласының экономикалық дамуы, өндіріс саласындағы жаңа жобалар мен жастар үшін ұсынылатын мүмкіндіктер туралы кеңінен баяндады. Жиын барысында жұмыс іздеу үдерісін жеңілдету мақсатында «Электрондық еңбек биржасы» платформасын пайдалану жолдарына ерекше назар аударылды. Бұл жүйе жұмыс берушілер мен жұмыс іздеушілер арасындағы өзара іс-қимылды жеңілдетіп, бос жұмыс орындары туралы ақпаратты жедел алуға мүмкіндік береді.
Әкімнің орынбасары студенттерге бұл платформаның жұмыс істеу қағидаларын түсіндіріп, оны қолданудың тиімді жолдарымен таныстырды. Сонымен қатар кездесуде жастардың еңбек нарығы туралы хабардарлығын арттыру мәселелері қозғалды. Жаңасыл Сабырұлы жұмыс берушілермен байланыс орнату, түйіндеме дайындау және сұхбатқа дайындалу бойынша пайдалы кеңестер берді. Ол сондай-ақ жастарды белсенді болуға, кәсіби дағдыларын жетілдіруге және еңбек нарығындағы өзгерістерге дайын болуға шақырды. Кездесу барысында студенттер өздерін толғандыратын сұрақтарын қойып, жұмысқа орналасуға қатысты пайдалы ақпарат алды.
