Түлкібас ауданына қарасты Арыстанды ауылдық округінде экотуризмді дамытуға бағытталған ALTY KÖL жобасы бастау алды, деп хабарлайды ALTYNQALA.KZ ақпарат агенттігі.
Жеке кәсіпкер Ғабит Пернебаев өз меншігіндегі 10 гектар жердің 5 гектарына алты жасанды көл жасап, қалған бес гектарына сирек кездесетін ағаш түрлерін, сондай-ақ алма, жүгері және бақша өнімдері – қауын мен қарбыз еккен.
Қазірдің өзінде бұл көлдерге балық шабақтары жіберілуде. Бір су айдынына — 10 мың форель шабағы, екіншісіне — бекіре тұқымдас балық шабақтары жіберілді.
Кәсіпкер алдағы уақытта бұл аумақты абаттандырып, демалыс орнына айналдыруды жоспарлап отыр. Демалушылар үшін этноауыл, амфитеатр, шағын хайуанаттар бағы, демалыс үйлері, спорт алаңдары, атпен серуендеу және басқа да қызмет түрлері ұсынылмақ.
Жобаның идеясын кәсіпкер Австриядан алған, ал оның жүзеге асу моделін ресейлік мамандар дайындаған. Аудан әкімі Асқар Естібаев орынбасары Ғани Құрманбаймен бірге нысанды аралап, жобамен танысты.
Аудан басшысы мемлекеттік қолдау шаралары туралы айтып, кәсіпкерге балыққа арналған жем-шөптің 30 пайызын субсидиялау мүмкіндігін ұсынды.
Айта кетейік, биыл Түлкібас ауданында жалпы құны 4,4 миллиард теңге болатын туризмді дамытуға бағытталған үш ірі жобаны жүзеге асыру жоспарланып отыр. Бұл жобалар нәтижесінде 220 жұмыс орны ашылады деп күтілуде
