Ақмола облысының әкімі Марат Ахметжанов іссапармен Степногорск қаласында болып, көпсалалы аурухананың жаңғырту жұмыстарымен танысты, деп хабарлайды altynqala.kz тілшісі.
Медициналық мекемеде жүргізіліп жатқан жаңарту-жетілдіру шаралары науқас жандарға заманауи және жайлы қызмет көрсету, ем-дом сапасын жаңа деңгейге көтеру мақсатында қолға алынып отыр. Құрылыс барысы жөнінде аурухана бас дәрігерінің міндетін уақытша атқарушы Тоқтар Қоңырбаев былай деп мәлімдеді.
– Мердігер компания ішкі әрлеу жұмыстарын тәмамдап, инженерлік жүйелерді түгелдей жаңартып шықты. Жоспарланған жұмыстар толық аяқталғаннан кейін аурухана халықаралық стандарттарға толық сай, сапалы емдеу қызметін ұсынатын орталыққа айналмақ. Қазіргі таңда мұнда 246 төсекорынмен және 24 күндізгі стационар төсегімен қамтамасыз етілген. Ол Степногорск қаласы мен маңайдағы елді мекендердің 40 мыңнан астам тұрғынына қызмет көрсетіп отыр. Алдағы уақытта ауруханаға жүгінетіндердің саны 162 мың адамға дейін көбейеді деп күтілуде, оның ішінде Бурабай, Ақкөл, Бұланды және Шортанды аудандарының тұрғындары да қамтылмақ. Сапар барысында Марат Ахметжанов медициналық колледж студенттерімен кездесіп, олардың кәсіби болашағы туралы әңгіме қозғады. Әкім жас мамандарды даярлаудың маңыздылығын ерекше атап өтіп, болашақ медицина қызметкерлерінің өңірдегі денсаулық сақтау саласын дамытудағы рөлін жоғары бағалады. Сонымен қатар облыс басшысы Степногорск қаласының әкімдігіне және Денсаулық сақтау басқармасына жөндеу жұмыстарының белгіленген мерзімде әрі сапалы аяқталуын қадағалауды, сондай-ақ қажетті қаржылық мәселелерді шешуді тапсырды.
«Медициналық мекемелерді жаңғырту – бұл тек ғимараттарды жөндеу емес, ең алдымен ол біздің тұрғындардың денсаулығы мен өмір сүру сапасын жақсартуға бағытталған үлкен қадам. Осы жоба Мемлекет басшысы Қасым-Жомарт Тоқаевтың денсаулық сақтау жүйесін жаңғырту жөніндегі тапсырмаларына толықтай сәйкес келеді. Атқарылған жұмыстардың нәтижесінде Степногорск тұрғындары заманауи әрі сапалы медициналық көмекке қол жеткізеді», – деп түйіндеді облыс әкімі.
Бұл маңызды бастама тек қаланың емес, тұтас өңірдің медицина саласына тың серпін беріп, халықтың өмір сүру сапасын арттыруға үлес қоспақ.
