2 ақпан – Ұлттық басылым күні Степногорск қаласында «ALTYN QALA» газетінің алғашқы нөмері жарыққа шықты . Баспадан жаңа шыққан басылымды қалың көпшілікке таныстыру мақсатында Мәдениет үйінде ауқымды жиын өткізілді. Халқымыздың рухани өміріне заманауи серпін беретін жаңа басылымның ресми таныстырылымына өңірдегі әр сала басшылары мен мәслихат депуттары, қоғамдық ұйымдардың өкілдері қатысты деп хабарлайды altynqala.kz тілшісі.
Тарихи жиында басылымға бағыттап алғашқы құттықтау сөзін Степногорск қаласының әкімінің орын басары Жанасыл Сабырұлы арнады. Ол өз сөзінде: «Баспасөз – қоғамның айнасы, ел дамуының көрсеткіші. Журналистердің шынайы ақпарат таратуы, қоғамдық пікірді қалыптас- тыруы халық пен биліктің арасын байланыстыратын алтын көпір іспеттес. Қаламыздағы ақпарат саласын кеңейтіп, оқырмандарына сапалы контент ұсынуды мақсат еткен басылым қатарына бүгін тағы біреуі қосылып жатқандығы қуантады. Жаңа басылым қаламыздың әлеуметтік-экономикалық тынысын ашық көрсетіп, елдің мәдени-рухани саласының дамуына үлкен үлес қосады деп сенеміз. Ұжымға шығармашылық табыс, оқырмандарының қатарының көп болуын тілейміз!» деп ақжарма тілегін арнады.
Мінберде одан кейін сөз кезегін игі бастаманың басында тұрған, газеттің негізін қалаушы, ұлттық руханияттың жанашыры, ақын Бауыржан Қарағызұлы алды. Газеттің мақсат-мүддесін таныстырған ол: «Бүгінгі күн – мен үшін ерекше күн! Өйткені біз көптен бері ойға алған асқақ арманымызды жүзеге асырып отырмыз. «Altyn Qala» газеті – бұл жай ғана басылым емес. Бұл – қаламыздың шежіресін жазатын, халықтың үнін жеткізетін, жаңалықты халыққа адал түрде ұсынатын тәуелсіз басылым.
Бұл газеттің алғашқы саны 2 ақпан – Ұлттық басылым күні жарық көрді. Біз бұл күнді бекер таңдаған жоқпыз. Өйткені бұл – қазақ журналистикасының бастауы саналатын, елдік мүддені қорғау жолында баспасөздің айрықша рөл атқаратынын білдіретін ерекше күн. Біздің мақсатымыз – тек жаңалық тарату емес, әділ ақпарат ұсыну, халықтың шынайы даусын жеткізу. Заманауи технологияның дамуына байланысты біз газетіміздің altynqala.kz атты ресми веб-сайтын да іске қостық. Бұл сайт – жылдам ақпарат алудың сенімді көзі, халықпен тікелей байланыс орнататын ашық платформа. Сондықтан ұлтруханиятына қызмет ету – біздің басты міндетіміз!» деп газеттің электронды нұсқасымен таныстырды.
Сөз тізгінін алған бас редактор, белгілі журналист Дәулет Асау жиналған қауымды басылымның қызметкерлерімен таныстырып, газеттің бағыт-бағдары, ішкі мазмұны туралы әңгімелеп берді. «Газет ашу – өте жауапты іс. Бәрінен де оны заман ағымына сай, оқырмандардың жоғары талаптарынын қанағаттандыра алатындай етіп шығарып отыруымыз маңызды. Сіздер бұдан өзекті ақпараттар мен әлеуметтік-экономикалық тақырып тағы талдауларды, танымдық материалдарды оқи аласыздар.
Сондай-ақ тұрмыстық түйіткілдер мен түрлі мәселелерге қатысты өздеріңіз де қалам сілтеп, ұсыныс-тілектеріңізді жеткізе аласыздар. Бұл жұмысымыз- да біз қаланың зиялы қауымымен, қоғаммен тығыз байланыс орнатып, газеттің бетін ашық диалог алаңына айналдыра аламыз деген үміттеміз. Басылымның таныстырылымына келіп, тілеулестік білдіріп отырғандарыңызға рақмет. Ең алдымен, жергілікті қауыммен ой-пікір алмасуға жағдай жасап, осындай алқалы жиын ұйымдастырып отырған қала басшылығына айтар алғысымыз зор», деп сөзін қайырды.
Ардагерлер кеңесінің басшысы Фарида Боташевна: «Қаламызда газетті іздеп жүріп оқитын ардагерлер үшін бұл қуанышты жаңалық. Ел ішінде болып жатқан іс-шаралар, маңызды жаңалықтарды, рухани-танымдық материалдарды енді жаңа басылымнан оқи алатындығымыз қандай тамаша! Біздің қатарымызда еңбек ардагерлері, әр салада жұмыс істеген зейнеткерлер бар. Сондықтан газеттің бір бетін бізге арнасаңыздар екен деп ұсыныс білдіргім келеді. Бастамаларыңыз оң болсын!» деп ұжымдық жұмысқа сәттілік тіледі.
Мәслихат депутаты Александр Накошный жаңа бастамаға қолдау танытып, «Біздің қаламызға екпіні мықты жаңа басылымның келіп жатқандығына қуаныштымыз. Ел ішінде жазылып, айтылуы керек ауқымды мәселелер көп. Қала қарыштап дамып келеді. Білім, ғылым, мәдениет саласының мәселелерін дер кезінде халыққа жеткізіп, елдің ықыласына бөлене беріңіздер!» деп тілектестігін білдірді.
Газеттің бірінші нөмерінің мазмұнын, сапасын жоғары бағалаған алғашқы оқырмандары өз ұсыныстары мен талап-тілектерін жеткізді. Өңірлік басшылық газетпен тығыз қарым-қатынаста, нәтижелі жұмыс жасауға уағдаласты. Ел ішіндегі мәселенің уақытылы шешілуіне оң үлесін тигізетін басылымы болатындығына сенім білдіріп, жаңа жоспарлармен танысты.
