Степногорск қаласының әкімі Гайдар Қасенов Қырыққұдық ауылына барған сапарында жаңадан ашылған «Сұңқар» мәдени-спорттық кешеніне арнайы келіп, ондағы игі істермен танысты, деп хабарлайды altynqala.kz тілшісі.
Қырыққұдық ауылы 2013 жылы 11 сәуірде Степногрск қаласының қарамағына берілген. Содан бері тоқсаныншы жылдардың тоқырауында экономикалық қиыншылықтардан тұралап қалған елді мекенде талай игілікті істер атқарылды. Ауыл іші кір-қоқыстан тазартылып, әр үйге ауызсу тартылды. Жолдардың ой-шұңқыры тегістеліп, көшелері толықтай жарықтандырылды, асфальтталды. Енді, міне, халық көптен күткен мәдениет пен өнер ордасы бой көтеріп отыр.
«Бітер істің басына жақсы келер қасына» демекші, бұл жұмыстардың бәріне ауыл әкімі Дулат Жахин бастамашыл болып жүргенін де айта кеткен жөн. «Сұңқар» кешені – тек спорт пен мәдениеттің тоғысқан орны ғана емес, ауылдың жүрегіне айналатын рухани ошақ. Зәулім ғимараттың ішінде заманауи спорт залы, кітапхана, акт залы, сондай-ақ шахмат, дойбы және ұлттық «Тоғызқұмалақ» ойынына арналған бөлмелер бар. «Бұл кешен ауыл тұрғындары үшін тек уақыт өткізетін орын емес, демалыс пен шығармашылықтың, ой мен рухани дамудың біртұтас мекеніне айналатынына сенемін», деді қала әкімі кешенді аралау барысында.
Кешеннің есігінен енген сәттен-ақ көрермендерді жылылыққа толы атмосфера қарсы алды. Келушілер үшін арнайы шағын концерттік бағдарлама ұйымдастырылып, ауылдың нәзік бүлдіршіндері қатысқан «Қыс ханшайымы» байқауы өткізілді. Ақ ұлпа қардай үлбіреген жас арулар өз өнерлерін көрсетіп, жиналған жұртшылықтың жүрегіне шаттық пен мейірім сыйлады. Қала басшысы Гайдар Қабдоллаұлы балалардың шынайы дарыны мен қуанышты жүздеріне сүйсініп: «Осындай игі шаралар жас буынды шыңдап, жетілдіріп, олардың болашаққа деген сенімдерін нығайта түседі. Өнерге, спортқа жақын ұрпақ – салауатты қоғамның тірегі, жарқын болашақтың кепілі», деп атап өтті.
«Сұңқар» – тек атауы ғана қыран құс емес, ол ауылдың мәдениет пен спорт арқылы биікке самғаған жас буынының символына айналды. Сондықтан Қырыққұдық ауылында жаңадан ашылған мәдениет пен өнер ордасы келешекте руханияттың, талант пен шеберліктің, ұлттық құндылықтар мен заманауи дамудың тоғысқан алтын бесігіне айналарына сенеміз.
Ауыл тұрғындары үшін бұл кешен жанға жылу, ойға азық, жүрекке демеу болатын орынға айналмақ. Бәлкім, дәл осы шаңырақтан келешектің тұлғалары қанат қағып, ел мақтанышына айналар…
