Степногорск қаласының қоғамдық-саяси ахуалы тұрақты деп хабарлайды altynqala.kz тілшісі.
Бұл тұтас қоғамның тығыз қарым-қатынаста және өзара үйлесімді жұмыс істеуінің жемісі екеніне дау жоқ. Алайда бұған қарап қалада тұрғындардың тұрмыстық қажеттіліктеріне қатысты проблемалардың бәрі тегіс шешіліп тасталды деуге келмес. Қоғамдық тұрақтылық – бейғамдықты көтермейтін шетін мәселе! Өйткені өмір болған соң, күнделікті түйткілдердің күнделікті туындап тұратындығы түсінікті. Мұның ішінде ең өзектісі – тұрғын үй-коммуналдық шаруашылық, жылыту және су құбырлары желілерінің жағдайы, жолдардың сапасы, сондай-ақ, қоқыс шығару жұмыстарына қатысты. Бұл сұрақтар қоғамның бірінші кезекті мұқтаждықтары болғандықтан, олардың шешілуі азаматтардың көңіл-күйіне, өмір сүру сапасына айтарлықтай әсер етеді.
Әлеуметтік желілердің ықпалы күшті
Бүгінгі цифрлық заманда медиа конфигурациясы күрделене түсті, сонымен қатар желілік кеңістік дәстүрлі ақпарат құралдарын ығыстыруда. Осыған орай жаңалықтарды алу үшін дәстүрлі, институционалдық байланыс арналарын (теледидар, радио және баспасөз) ғана емес, сонымен қатар жаңалық сайттары, әлеуметтік желілер, мессенджерлер және YouTube сияқты институционалдық емес дереккөздерін жиі пайдаланатын болдық. Бұл – XXI ғасырдың түбегейлі жаңа әдеті, яғни жаңалық көздерін таңдаудағы жаңа үрдіс.
ҚСЗИ-дің 2024 жылғы жүргізген зерттеулеріне сүйенсек, адамдардың көпшілігі ақпаратты интернет көздерінен алады( 54,3%). Екінші ең танымал ақпарат көзі – әлеуметтік желілер ( 48,2%). Ал үшінші орында – теледидар (43,8%). Осылайша, қазақстандықтардың басым көпшілігі жаңалықтарды цифрлық құрылғылар – смартфон, планшет немесе компьютерлер арқылы алады. Сондықтан да құзырлы органдар тұрғындардың жалпы қоғамдық-саяси ахуалына талдау жасау үшін ең алдымен әлеуметтік желілерге жүгінетіні сөзсіз.– Әлеуметтік желілер қазіргі уақытта қоғамдық пікірдің қалыптасуына айтарлықтай ықпал етіп отыр. Степногорск қаласында да бұл үрдіс айқын байқалады. Әлеуметтік желілерді жүйелі түрде мониторингтеу арқылы қала тұрғынарының мәселелеріне қатысты теріс пікірлері мен шағымдары анықталып, тиісті мемлекеттік органдарға жолданады. Бұл жағдай қоғам мен билік арасында ақпарат алмасуды жеңілдетеді, әрі жауапкершіліктің артуына себепші болады,– дейді бұл туралы Степногорск қаласының Мәдениет, тілдерді дамыту, дене шынықтыру және спорт бөлімінің басшысы Ләззат Кұсайынова.
Сонымен бірге әлеуметтік желілер азаматтардың қоғамдық пікірін білдіру алаңы ретінде де қызмет етеді. Мұндай шағымдар мен пікірлердің тез әрі тиімді түрде тиісті орындарға жеткізілуі мемлекет пен қоғамның өзара қарым-қатынасындағы транспаренттілікті арттыруға мүмкіндік береді. Дегенмен бұл да өз кезегінде жауапты органдардың әрекет ету жылдамдығына, сонымен қатар тұрғындардың сұраныстарын қанағаттандыру деңгейіне тікелей байланысты.
Степногорск қаласындағы қоғамдық ахуалдың тұрақтылығы көбіне мемлекеттік органдардың жұмысына байланысты. Жазылған өтініштер мен шағымдарға дер кезінде әрі сапалы жауап беру – тұрғындардың сенімін арттырудың негізгі кілті болып табылады. Бұл мәселенің өзектілігі мемлекет пен азаматтар арасындағы сенімнің нығаюына әкеледі.
– Мемлекеттік органдарға қойылатын негізгі талап – тек шығарып салма жауаптармен шектелмей, әрбірөтініштің мәніне терең үңіліп, нақты шешімдер ұсыну. Осылайша, мемлекеттік аппараттың тиімділігі мен оның қоғаммен байланысы жақсарады, ал бұл өз кезегінде қоғамдағы тұрақтылықты нығайтады. Жауапты органдардың жұмыстарының сапасы оң қоғамдық пікірдің қалыптасуына септігін тигізеді, – дейді Ләззәт Жанатқызы.
Жеке сектор ұйымдарының қызметі қарқынды
Қоғамдық татулықты сақтауда жеке сектор ұйымдарының атқарып отырған еңбегі зор. Қалада 25 жеке сектор ұйымы тіркелген. Олардың ішінде әлеуметтік қорғау мен көмек көрсетуге бағытталған ұйымдар бар. Мысалы, осы бағытта нәтижелі еңбек етіп жүрген «Ерлік» қоғамдық бірлестігі мен «Жаңа самғау» қоғамдық қорын ерекше атауға болады. Гендерлік саясат бойынша «Женский луч» қоғамдық бірлестігі және әскери-патриоттық тәрбиелеу бойынша «Ауған соғысы ардагерлері одағы» мен «Жастар қозғалысы» ұйымдары белсенді жұмыс атқарады. Сонымен қатар жеке сектор ұйымдары жыл сайын өз қызметтерінің есептерін мемлекеттік деректер базасына тапсырады және есеп беру бойынша практикалық көмек көрсетілетінін атап өту керек. Одан бөлек, өңірде 9 этномәдени орталық жұмыс істейді.
Бұл орталықтар халық арасында ұлттық бірлікті нығайту және қазақ халқының мәдениетін насихаттау бойынша түрлі іс-шаралар өткізеді. Биылғы жылы этномәдени орталықтар 40-тан астам іс-шара өткізді. Олар көрмелер, челлендждер, қайырымдылық акциялары және мемлекеттік тіл мен қазақ халқының дәстүрлерін насихаттауға бағытталған шараларды қамтиды. Этномәдени бірлестіктер, сондай-ақ Қазақстан халқы Ассамблеясының жобаларына белсене қатысады.
– Қаладағы этномәдени бірлестіктер ҚХА-ның «Жалпы аза маттық бірегейлікті қалыптасты ру», «Қазақтану», «Достық дәмі», «Ел бірлігі» жобаларын жүзеге асыруға қатысқан. Рухани келісім мен ұлтаралық бірлікті дамытуға қосқан үлесі үшін «Достық» үйінің басшысы Қоблан Кенжин мен қалалық музейдің директоры Майра Өмірбайқызы Қазақстан халқы Ассамблеясынан алғыс хаттарымен марапатталды, – дейді Ішкі саясат бөлімінің жетекшісі. Сондай-ақ қоғамдық тұрақтылықты қалыптастыруға діни бірлестіктердің қосқан үлесі үлкен. Қазіргі уақытта Степногорск қаласының аумағында 10 діни бірлестік жұмыс істейді. Оның ішінде 3 ислам діні бірлестігі, 2 православие, 1 католик және 4 протестанттық бірлестік бар. Діни бірлестіктердің басшылары қоғамдағы рухани келісім мен тұрақтылықты нығайтуға бағытталған іс-шараларға белсенді қатысады. Былтыр экстремизм мен терроризмнің алдын алу бойынша 120 іс-шара өткізілген, оның ішінде лекция, тренинг және ашық әңгімелер бар.
Мемлекеттік әлеуметтік тапсырыс аясында жүзеге асырылған жобалар
Ішкі саясат бөлімінің басшысы Л.Кұсайынованың айтуынша, мемлекеттік әлеуметтік тапсырыс аясында бірқатар жобалар жүзеге асырылған. Олардың арасында жемқорлыққа қарсы мәдениетті қалыптастыруға бағытталған жобалар бар. Мысалы, «Болашақ» қоғамдық қоры мемлекеттік қызметшілер арасында жемқорлыққа қарсы лекциялар мен конкурстар ұйымдастырды. Жоба аясында мемлекеттік қызметшілер арасында лекциялар, «Жемқорлықсыз болашақ» эссе байқауы, «Жаңару» сыбайлас жемқорлыққа қарсы республикалық қозғалысы төрағасының орынбасарының қатысуымен Заводской мен Ақсу ауылдарында көшпелі кездесулер өткізілді. Халық арасында аудио және бейне мазмұндар, брошюралар әзірленіп таратылды. «Біз әртүрліміз, бірақ біз теңбіз» атты этносаралық қатынастарды нығайту жобасы аясында «Женский луч» қоғамдық ұйымы дөңгелек үстел, «Менің Отаным — Қазақстан» атты этно-камп, «Қазақстан халқы Ассамблеясы» диалог алаңы, «Тұлға боламын» хакатонын ұйымдастырды. Бес- төбе ауылында отбасы институтын нығайту және отбасылық құндылықтарды насихаттау мақсатында «Family Fest» отбасылық фестивалі өткізілді. Түрлі тақырыптар бойынша тұрақты түрде тікелей эфирлер өткізіліп тұрады: «Әлеуметтік желілер арқылы дәстүрлі емес діни ағымдардың ықпалы», «Деструк тивті діни ағым ұғымының мәні және адамдардың осы ағымдармен жүру себептері», «Конфессияаралық және ұлтаралық келісім» және тағы басқа. Сонымен қатар қалада «Экстремистік идеялардың ықпалынан туыстарыңызды қорғаңыз» деген сенім телефондары көрсетілген 1 баннер орнатылған.– Діни қызмет саласында құқыққа қайшы әрекеттер тіркелмеген. Жалпы алғанда, қаладағы діни ахуал тұрақты және ол тиісті мемлекеттік органдардың ұдайы бақылауында,– деді Ләззәт Жанатқызы.
Волонтерлік жобаларды қолдау аясында жастарды волонтерлік қызметке тарту бойынша «Жаңа ұрпақ Степ» қоғамдық қоры «Мен волонтермін» жобасын іске асырды. Іс-шараның мақсаты – жастар арасында волонтерлік қызмет дағдыларын дамыту. Іс-шара аясында келесі іс-шаралар өткізілді: «Волонтерлер туралы заңды түсіндіру. Волонтерлік іс-шараларда қауіпсіздік негіздері, төтенше жағдайларда алғашқы көмек көрсету және негізгі дағдылар» атты оқу семинары, «Волонтерлік – керемет!» интеллектуалдық ойыны, «Әртүрлі топтармен, соның ішінде балалармен, қарттармен, мүмкіндігі шектеулі адамдармен тиімді қарым-қатынас, командалық дағдыларды дамыту, ынтымақтастық, мәселелерді шешу және жобаларды басқару» атты оқу семинары, «Қайырымдылық, достық туралы фильм» киножиыны, «Команда – волонтерліктің маңызды элементі» мастер-класы, «Жеке даму» ворк шопы, тимбилдинг. Степногорск қаласының ТЖ басқармасымен бірлесіп «Taza orman», «Добрые лапы», «Qamqor» акциялары аясын да әлеуметтік осал топтарға азық түлік себеттерін тарату шаралары өткізілді.
Жастар – қоғамның қозғаушы күші
Жастар саясатын жүзеге асыру аясында 229 түрлі іс-шара өткізілген. «Қауіпсіз болашақ» жастар қозғалысы құрылды. Оның мақсаты – наркоманияның таралуына қарсы күрес. Жастар арасында есірткінің таралуы мен қолданылуының алдын алу мақсатында денсаулық сақтау, ішкі істер органдарының мамандары мен психологтарды тарта отырып, есірткіні қолданудың қауіптілігі мен салдары туралы дәрістер, тренингтер өткізілді. «Нашақорлыққа жол жоқ» бейнероликтер конкурстары ұйымдастырылды, брошюралар таратылып, ақпараттық іс-шаралар өткізілді. Жастарды волонтерлік қызметке тарту мақсатында «Мен волонтермін» жобасы іске асырылды. Бұл жобада жастар арасында волонтерлік дағдыларды дамыту үшін түрлі оқыту семинарлары мен акциялар ұйымдастырылды. Сонымен қатар волонтерлер балалар үйлеріне барып, арнайы іс-шаралар өткізді. Бұл жастардың қоғамға деген жауап- кершілігін арттыруға ықпал етті. Сондай-ақ олардың арасында білім беру мен мәдени іс-шаралар ды ұйымдастыру ерекше назарда. «Таланттар шайқасы» сияқты конкурстар, «Арулар – асыл жандар» акциясы мен «Жеңіс лентасы» сияқты шаралар жастарды патриотизмге тәрбиелеуге және олардың қоғамдық белсенділігін арттыруға бағытталған.
Қарабұлак, Қырыққұдық, Бестөбе және Изобильное ауылдарын да жастарға арналған ақпараттық-түсіндіру кездесулері өткізілді. Оның барысында қатысушыларға жастар бастамаларын қолдау үшін микрокредиттер алудың мүмкіндіктері, қолжетімді мемлекеттік гранттар, негізгі құқықтық мәселелер туралы егжей-тегжейлі түсінік беріліп, сондай-ақ өзекті вакансиялар ұсынылды. Бұл жастардың жеке және кәсіби даму мүмкіндіктері мен білімдерін кеңейтуге ықпал етті. «Жасыл Ел» бағдарламасы аясында жазғы кезеңде Степногорск қаласының 125 жасы жұмысқа орналастырылды. «Жасыл Ел» сар баздары қала аумағын тазалау және абаттандыру бойынша жұмыстар атқарды. Ақмола облысы бойынша «Жасыл Ел» жобасының «Үздік штабы» атағын Степногорск қаласының Жастар ресурстық орталығы иеленді. Ағымдағы жылдың соңына дейін жастар үшін қалалық мәслихат де путаттарының қатысуымен «Жайдарман» және пікірсайыс шаралары өткізу жоспарланған.
Қорытынды
Степногорск қаласының Мәдениет, тілдерді дамыту, дене шынықтыру және спорт бөлімі әлеуметтік тұрақтылықты нығайту мен ұлттық келісімді қамтамасыз ету жолында жүйелі жұмыстар атқарып келеді. Этносаралық, діни және жастар арасындағы келісім мен бірлікті нығайту үшін түрлі жобалар жүзеге асырылды. Алдағы уақытта осы бағытта жұмыстарды жалғастыру және жастар арасында салауатты өмір салтын насихаттау, сондай-ақ діни экстремизмнің алдын алу мәсе лелеріне ерекше көңіл бөлу қажет.
