2025 жылғы 12 маусым күні Степногорск қаласындағы «Горняк» мәдениет үйінде AMANAT партиясының Степногорск қалалық филиалының кезекті 38-конференциясы өтті. Маңызды саяси іс-шараға қала, кент, ауыл және ауылдық округтерден сайланған 70 делегат қатысты, деп хабарлайды ALTYNQALA.KZ ақпарат агенттігі.
Олардың қатарында 16 партиялық органның өкілдері бар. Барлық делегаттар жоғары немесе арнаулы білімге ие, қоғам өмірінде белсенділік танытып жүрген азаматтар. Конференция AMANAT партиясының жарғысына сәйкес өткізілді. Делегаттардың өкілеттігі заңды түрде бекітіліп, конференцияның жұмысын бастауға рұқсат берілді.
Күн тәртібіндегі маңызды мәселелердің бірі – ауыл және кент әкімдерін сайлау болды. Жергілікті басқару жүйесін жетілдіру және халықпен тығыз байланыста жұмыс істей алатын білікті басшыларды анықтау мақсатында бұл сайлау ерекше маңызға ие болды. Дауыс беру ашық түрде өтті. Делегаттардың белсенді қатысуымен ауыл және кент әкімдігіне үміткерлер тыңдалды. Баяндамашыларға 15 минут уақыт беріліп, үміткерлер өз бағдарламаларын таныстырды. Одан кейін ашық дауыс беру арқылы бірқатар ауыл мен кент әкімдері сайланды. Сайлау барысы әділ, ашық және демократиялық негізде өтті. Делегаттар өз таңдауларын жасай отырып, жергілікті жерлердегі даму мен тұрғындардың әл-ауқатын арттыруға нақты үлес қосатын азаматтарды қолдады.
Сонымен қатар конференцияда сайлау туралы заңнамадағы өзгерістер, партияның алдағы міндеттері мен бастауыш партия ұйымдарының жұмысы да талқыланды. Қатысушылар AMANAT партиясының ел мүддесін көздейтін саяси бағытын қолдап, алдағы уақытта да партияның белсенді мүшесі болуға дайын екендіктерін білдірді.
Бұл конференция — жергілікті өзін-өзі басқаруды нығайтуға, партияның өңірлік деңгейдегі жұмысын жандандыруға және ауыл, кент өмірін жақсартуға бағытталған маңызды қадам болды.
