Степногорск қаласында Балаларды қорғау күні ерекше форматта аталып өтті, деп хабарлайды Altynqala.kz ақпарат агенттігі
30 мамыр күні Степногорск қаласындағы Горняк мәдениет үйінде Балаларды қорғау күніне арналған мерекелік іс-шара ұйымдастырылды. Бұл игі бастама әсіресе көп балалы отбасылардың бүлдіршіндері мен мүмкіндігі шектеулі балаларға арналды. Шараға келген балалар ата-аналарымен бірге шаттыққа толы, көңілді уақыт өткізді.
Іс-шараны ұйымдастырған — Горняк мәдениет үйінің әлеуметтік бөлімі. Балаларға қуаныш сыйлаған бұл мерекеге қалалық жұмыспен қамту және әлеуметтік бағдарламалар бөлімінің басшысының орынбасары Анаргүл Советқызы арнайы қатысты. Сонымен қатар, іс-шараның бас демеушісі — “Астана Нан” ЖШС директоры Талғат Қайратұлы да өз қолдауын білдіріп, шараға қатысып, бүлдіршіндердің қуанышын бірге бөлісті.
Мереке аясында балаларға арналған қызықты ойындар мен көңілді қойылымдар ұйымдастырылды. Керемет концерттік бағдарлама бүлдіршіндердің жүзіне күлкі мен қуаныш сыйлады. Ата-аналар да бұл жылы шараға алғысын білдіріп, ұйымдастырушыларға ризашылықтарын жеткізді.
Шара барысында балаларға бас демеуші арнайы сый-сияпаттарын табыс етті. Бұл — қоғамның ең нәзік тобына көрсетілген жанашырлық пен қолдаудың айқын үлгісі.
Мұндай шаралар балалардың өміріне жарқын естеліктер сыйлап қана қоймай, оларға деген қоғамның шынайы қамқорлығын сезіндіреді. Ұйымдастырушылар мен демеушілерге алғыс білдіре отырып, бұл бастаманың дәстүрге айналатынына сеніміміз мол.
