Польшадағы Торунь қаласында ерекше қажеттіліктері бар жандарға арналған дәстүрлі Seni Cup – 2025 футбол турнирі өтті. Бұл сайыста Қарағандыдағы №2 Арнайы әлеуметтік қызмет көрсету орталығының «Arlan Karaganda» командасы барлық ойын қорытындысы бойынша бесінші орын иеленді, деп хабарлайды ALTYNQALA.KZ ақпарат агенттігі.
Турнирге Польша, Германия, Чехия, Венгрия, Литва, Латвия, Эстония және Қазақстаннан барлығы 30 команда қатысты. Қазақстан атынан Қарағанды қаласының №2 әлеуметтік қызмет көрсету орталығының тәрбиеленушілері – «Arlan Karaganda» командасы сынға түсті.
– Команда бұрыннан бар. Жігіттер үнемі жаттығып, жақсы нәтиже көрсетіп жүр. Польшаға бару үшін олар Астана мен Алматыда өткен іріктеу кезеңдерінен сүрінбей өтті. Шетелге бірінші рет шығып отырған жоқ. Мысалы, 2023 жылы да дәл осы турнирде екінші орын алған болатын, – деді орталық директоры Аслан Мекентай.
Қарағандылықтар қарсыластарының биыл өте жақсы дайындалғанын және ойындардың тартысты өткенін айтты. Ең қиыны – іріктеу кезеңінен өтіп, финалға шығу мүмкіндігі бар үздік 12 команда қатарына ену болған. Барлық ойын нәтижелері бойынша қарағандылықтар өздерін лайықты көрсетті және турнир кестесінде бесінші орын алды. Команда естелік сыйлықтармен және дипломдармен марапатталды.
– Балалар өз нәтижелеріне риза. Ең бастысы – қатысу. Олар шетелге шығып, өздерін көрсетіп, әлемді көріп келді. Егер футбол болмаса, мұндай мүмкіндік болмас еді, – дейді Аслан Мекентай.
