Қырғызстан астанасы Бішкек қаласында 20 жасқа дейінгі жастар арасында грек-рим күресінен Азия чемпионаты өтті. Құрлық біріншілігінде жүлдегерлер 10 салмақ дәрежесінде анықталды, деп хабарлайды ALTYNQALA.KZ ақпарат агенттігі.
Жалпыкомандалық есепте Қазақстан жастар құрамасы екі алтын, бір күміс және үш қола медаль жеңіп алып, үшінші орын иеленді. Ал бірінші орынды төрт алтын және бес қола медальмен Иран құрамасы, екінші орынды екі алтын, үш күміс және екі қоламен Қырғызстан құрамасы иеленді.
Қазақстан қоржынына бір қола медальді Қостанай облысы әкімдігінің дене шынықтыру және спорт басқармасына қарасты Жоғары спорт шеберлігі мектебінің және Владимир Матвиенко атындағы ДЮШОР-дың тәрбиеленушісі, Қазақстан Республикасының спорт шебері Алихан Дурсунов салды. Ол 72 кг салмақ дәрежесінде өнер көрсетіп, Азия чемпионатына жаттықтырушылары Марат Мұхамбетов пен Артем Сошкиннің жетекшілігімен дайындалған. Континенттік біріншілікке жолдаманы Дурсунов осы салмақта жастар арасындағы Қазақстан чемпионатында жеңіске жетіп алған болатын.
Бішкекте өткен жарыста қостанайлық балуан үш белдесу өткізді. Ширек финалда тәжікстандық балуанды жеңіп, жартылай финалда қырғызстандық Илгиз Каныбековке есе жіберді. Алайда қола медаль үшін күресте жапон балуаны Кенто Номураны жеңіп, жүлдегер атанды.
Сондай-ақ, қазақстандық балуандардан Ерасыл Мусан (55 кг) мен Есбол Шамилов (63 кг) қола жүлдеге, Омар Дүйсенбек (77 кг) күміс жүлдеге ие болса, Темірлан Турдақын (87 кг) мен Диас Сейітқалиев (82 кг) Азия чемпиондары атанды.
