Степногорск қаласында Бұқаралық ақпарат құралдары қызметкерлері күні аталып өтті, деп хабарлайды ALTYNQALA.KZ ақпарат агенттігі.
27 маусым күні Степногорск қаласының әкімдігінде Бұқаралық ақпарат құралдары қызметкерлерінің кәсіби мерекесіне арналған салтанатты жиын өтті. Бұл шара – ақпарат кеңістігінде аянбай еңбек етіп жүрген тілшілерге, операторларға, редакторлар, блогер мен баспа қызметкерлеріне деген алғыс пен құрметтің жарқын көрінісі болды.
Салтанатты жиынға Степногорск қаласы әкімінің міндетін атқарушы Фархат Байқас және қала әкімінің орынбасары Жанасыл Сабырұлы арнайы қатысып, жергілікті бұқаралық ақпарат құралдары өкілдерін кәсіби мерекелерімен құттықтады.
«Ақпарат – қоғамның айнасы. Сіздердің елеулі еңбектеріңіз арқылы қала тұрғындары маңызды жаңалықтардан, мемлекеттік саясаттың жүзеге асу барысынан, күнделікті тіршіліктің тынысынан хабардар болып отыр. Сіздердің қаламдарыңыз – шындықты сөйлетіп, ел мен билік арасындағы алтын көпірге айналды», – деді өз сөзінде қала әкімінің міндетін атқарушы Фархат Байқас
.Журналистерге алғыс пен құрмет
Жиын барысында қаланың қоғамдық-саяси және әлеуметтік өмірін насихаттауда белсенділік танытқан барлық БАҚ өкілдері қала әкімдігінің Алғыс хаттарымен және естелік сый-сыяпаттармен марапатталды. Бұл – қалам ұстаған қауымның қажырлы еңбегіне берілген жоғары баға. Мерекелік шараның шарықтау шегінде ақпарат саласының үздіктері сахна төрінен орын алып, көрерменнің ыстық ықыласына бөленді.
«Алтын қала» – Ақмоланың мақтанышы
Жиын барысында жергілікті «Алтын қала» газетінің биылғы мереке қарсаңында үлкен жетістікке қол жеткізгені де атап өтілді. Басылым Кербез сұлу Көкшетау өңірінде өткен «Арқа төрі— Ақмола» облыстық байқауында үздік деп танылып, ынталандыру сыйлығына ие болды. Бұл – редакция ұжымының бірлескен еңбегінің, шығармашылық ізденістің және кәсіби шеберліктің жемісі.
