Шпагамен жекелей сайыста Руслан Курбанов 1/8 финалға дейін жетіп, нейтралды команда атынан сынға түскен беларусь спортшысы Марк Семаненкомен кездесіп, тартысты жекпе-жекте небәрі бір ұпай айырмасымен жеңіліп қалды — есеп 13:14. Осылайша отандасымыз жарысты тоғызыншы орынмен аяқтады, деп хабарлайды ALTYNQALA.KZ ақпарат агенттігі.
Айта кетейік, 33 жастағы Руслан Курбанов — 2023 жылғы әлем чемпионатының қола жүлдегері. Бұл — Қазақстан тарихындағы семсерлесуден әлем біріншіліктеріндегі жалғыз медаль.
Руслан Курбанов әлем чемпионаты аясында өтетін командалық жарыстарға да қатысады. Ерлер құрамасы сапында ол Вадим Шарлаимов, Ерлік Сертай және Кирилл Проходовпен бірге ел намысын қорғайды.
