Ұлттық есеп – бұл елдің су қорының жай-күйі, оны қорғау және пайдалану туралы алдыңғы күнтізбелік жылға арналған талдамалық есеп.
Онда негізгі өзендердің су ресурстары туралы мәліметтер, су шаруашылығы бассейндері, өңірлер және экономика салалары бойынша талдауы, су шаруашылығы және гидротехникалық құрылыстардың, оның ішінде мемлекетаралық құрылыстардың саны мен жай-күйі туралы ақпарат қамтылады. Сондай-ақ құжатта су қорын қорғау бойынша іске асырылған іс-шаралар, инвестициялық жобалардың іске асырылуы және заманауи технологиялардың енгізілуі туралы мәліметтер көрсетіледі.
СЕРІКЖАН БЕКЕТЕЕВ
«Есепке қажетті ақпаратты орталық мемлекеттік және жергілікті атқарушы органдар есепті жылдан кейінгі жылдың 1 наурызына дейін ұсынуы тиіс. Ал Ұлттық есеп 1 мамырдан кешіктірілмей жарияланады. Бұл Қазақстанда су ресурстарын басқару мен пайдалануда ашықтықты қамтамасыз етуге тиіс. Су кодексі биылғы 10 маусымда күшіне енеді. Демек, бұл есепті біз 2026 жылдан бастап жариялай бастаймыз», – деді Су саясаты департаментінің директоры Серікжан Бекетаев.
