Қырғызстанның Чолпон-Ата қаласында өткен дәстүрлі мәдениет пен музыкаға арналған алғашқы «Рух Санат» дүниежүзілік фестивалінде Қазақстанның өнерпаздары жеңіске жетіп, бірнеше жүлдені қанжығасына байлады, деп хабарлайды ҚазАқпараттың меншікті тілшісі.
🗓 1-2 тамыз күндері Ыстықкөл жағалауында өткен халықаралық байқауға Қазақстан, Өзбекстан, Ресей, Жапония, Үндістан, Египет, Оңтүстік Корея, Польша, Бангладеш, Гвинея, Эстония, Венгрия және Непалдан келген 8 жеке орындаушы мен 12 шығармашылық топ қатысты.
🏆 Жеке орындаушылар арасында Салтанат Қайратқызы (Қазақстан) мен Донгак Найдан (Ресей) бірінші орынды иеленіп, 200 мың сом (шамамен 1 млн 242 мың теңге) көлемінде сыйақы алды.
🎶 Шығармашылық ұжымдар арасында «Tengri Saz» ансамблі (Қазақстан) мен «Хараача» ансамблі (Ресей) бірінші орынды бөлісті. Жүлде қоры — 300 мың сом (шамамен 1 млн 863 мың теңге).
📜 Сонымен қатар, дәстүрлі мәдениет пен музыканы сақтауға қосқан үлесі үшін «Каусар» тобы (Қазақстан), «Klara Dudas and Borbala Toreky» дуэті (Венгрия) және «Super Trio» ұжымы (Польша) халықаралық қазылар алқасының арнайы дипломымен марапатталды.
🎤 Ұйымдастырушылардың айтуынша, фестиваль кәсіби өсім мен тәжірибе алмасуға мүмкіндік беретін мәдени диалог алаңына айналды. Бұл — материалдық емес мәдени мұраны сақтауға бағытталған маңызды қадам.
📅 «Рух Санат» фестивалі екі жыл сайын өтетін тұрақты халықаралық шара болады. Келесі фестиваль этникалық биге арналмақ.
