Степногорск қалалық мәслихатының кезектен тыс жиырма үшінші сессиясында 2025–2027 жылдарға арналған бюджетке өзгерістер енгізілді, деп хабарлайды ALTYNQALA.KZ ақпарат агенттігі.
2025 жылғы 26 маусым күні Степногорск қалалық мәслихатының сегізінші шақырылымындағы кезектен тыс жиырма үшінші сессиясы өтті. Сессия Қазақстан Республикасының «Қазақстан Республикасындағы жергілікті мемлекеттік басқару және өзін-өзі басқару туралы» Заңының 8-бабына сәйкес шақырылды.
Сессия отырысын қалалық мәслихат төрағасы Олжас Аманжолұлы жүргізді. Күн тәртібіне жергілікті маңызы бар екі өзекті мәселе шығарылып, қала мен ауылдық округтердің қаржы құжаттарына нақтылаулар енгізілді. Бұл өзгерістер республикалық және облыстық деңгейден бөлінген трансферттер мен субвенциялар көлеміне, сондай-ақ нақты қажеттіліктерге сәйкес әзірленді.
Қала бюджеті – қала дамуының негізі
Күн тәртібіндегі алғашқы мәселе – Степногорск қалалық мәслихатының 2024 жылғы 25 желтоқсандағы №8С-19/2 шешіміне өзгерістер енгізу, яғни 2025–2027 жылдарға арналған қала бюджетінің нақтылануы болды. Бұл туралы Степногорск қаласы әкімінің міндетін атқарушы Фархат Байқас кеңінен баяндама жасады. Оның айтуынша, нақтылау барысында қала бюджеті кіріс және шығыс бөліктері қайта қаралып, басым бағыттарға қаржы бөлу мәселесі қайта пысықталды. Әсіресе әлеуметтік нысандарды жөндеу, инфрақұрылымды жаңарту және коммуналдық қызметтердің тиімділігін арттыруға баса назар аударылған.
Ауылдық бюджеттер де назарда
Сессияның екінші мәселесі – 2024 жылғы 26 желтоқсандағы №8С-19/11 шешімге енгізілетін өзгерістерге қатысты болды. Бұл шешім Степногорск қаласына қарасты кенттер, ауылдар мен ауылдық округтердің 2025–2027 жылдарға арналған бюджетіне қатысты. Бұл бағыттағы баяндама ұсынылып, ауылдық аймақтардың ерекшеліктерін ескеріп жасалған нақтылаулар туралы айтылды. Елді мекендердің инфрақұрылымын дамыту, әлеуметтік-мәдени нысандарды жөндеу және ауыл тұрғындарының өмір сапасын жақсарту негізгі басымдықтардың бірі болып отыр
