2024–2025 оқу жылының қорытындысы бойынша Степногорск өңіріндегі білім бәйгесінде оза шапқан түлектерге құрмет көрсетілді. Оқу озаттары мен «Алтын белгі» иегерлері қала әкімі Гайдар Қабдоллаұлымен бірге естелік суретке түсті, деп хабарлайды ALTYNQALA.KZ ақпарат агенттігі.
Мұндай шара – үздік оқушыларға көрсетілген сый-құрмет қана емес, өскелең ұрпақты білімге құштарлықпен ұмтылуға ынталандыратын игі дәстүрдің жалғасы. Жүздеген оқушының арасынан суырылып шығып, үздіктер қатарынан көрінген жастар қала мақтанышына айналып отыр.
Шара барысында қала басшысы озат түлектерге сәт-сапар тілеп, алдағы білім жолында, мамандық таңдауда табысқа жетулеріне сенім білдірді. Сондай-ақ ата-аналар мен ұстаздардың да еңбегі ескеріліп, алғыстар айтылды.
Оқу озаттарының жарқын болашағы – өңірдің интеллектуалдық әлеуетінің айғағы. Еңбегімен ел үмітін ақтаған шәкірттер алдағы уақытта да Степногорск қаласының атын абыроймен танытатынына сенім мол.
