Фото: https://www.instagram.com/stepnogorsk_qalasynyn_akimdigi/ парақшасынан алынды.
Қаланың әлеуметтік-экономикалық дамуы мен өнеркәсіптік қауіпсіздікті қамтамасыз ету – билік пен ірі кәсіпорындардың бірлесе атқаратын негізгі міндеттерінің бірі. Осыған орай бүгін қала әкімі Гайдар Қасенов пен Степногорск қалалық мәслихатының төрағасы Олжас Жағыпаров «Алтыналмас АК» АҚ өкілдерімен ресми кездесу өткізді, деп хабарлайды altynqala.kz
Бұл кездесудің басты мақсаты – өңірдегі тау-кен өндірісінің дамуын, өнеркәсіптік қауіпсіздік талаптарының сақталуын және компанияның аймақтың әлеуметтік-экономикалық дамуына қосатын үлесін талқылау болды. Тараптар компанияның қызметі барысында туындайтын негізгі мәселелерге тоқталып, оларды шешу жолдарын қарастырды. Кездесу барысында бірқатар маңызды тақырыптар қарастырылды. Атап айтқанда, жарылыс жұмыстары кезінде өнеркәсіптік қауіпсіздік талаптарының сақталуы және өндіріс орындарындағы экологиялық стандарттардың орындалуы ерекше назарға алынды. Өндіріс аймағындағы қоршаған ортаға түсетін жүктемені азайту, экологиялық тепе-теңдікті сақтау, табиғи ресурстарды тиімді пайдалану мәселелері бойынша жанжақты пікір алмасу өтті. Сонымен қатар компанияның қаланың әлеуметтік дамуына қосатын үлесі де талқыланды. «Алтыналмас АК» АҚ өкілдері өңірдегі инфрақұрылымдық жобаларға қатысу, әлеуметтік маңызы бар нысандарды салу және жергілікті тұрғындарға жаңа жұмыс орындарын ашу сияқты бастамаларға дайын екендігін білдірді. Бұл өз кезегінде аймақтың тұрақты дамуына және халықтың әл-ауқатының артуына оң әсерін тигізбек.
