Қазақстандағы халықтар достастығы – бірлік пен тұрақтылықтың алтын діңгегі
Қазақстан – көпэтносты және көпконфессиялы мемлекет. Бүгінде елімізде 130-дан астам этнос өкілдері бейбітшілік пен өзара сыйластықта өмір сүруде. Бұл достастық – ғасырлар бойы қалыптасқан тарихи сабақтастықтың, төзімділік пен бірліктің, сондай-ақ мемлекеттің мақсатты саясатының жемісі.
Тәуелсіздік жылдарында Қазақстан этносаралық татулық пен келісімнің өзіндік моделін қалыптастырды. Бұл модельдің басты қағидаттары – тең құқықтылық, өзара құрмет, мәдени әралуандықты сақтау және дамыту. Елдің Конституциясы мен заңнамасында әрбір азаматтың тіліне, дініне, мәдениетіне және салт-дәстүріне құрметпен қарау қағидаты бекітілген.
Қазақстан халқы Ассамблеясы – халықтар достығын нығайтудағы негізгі институт. Оның бастамасымен елімізде халықаралық деңгейдегі мәдени фестивальдер, ғылыми-практикалық конференциялар, этномәдени бірлестіктердің форумдары өткізіледі. Бұл іс-шаралар тек мәдениеттердің өзара тоғысуын ғана емес, ел азаматтарының ортақ мақсаттар жолында бірігуін де қамтамасыз етеді.
Халықтар достастығы – еліміздің экономикалық, саяси және әлеуметтік дамуының кепілі. Өйткені бірлік бар жерде тұрақтылық бар, ал тұрақтылық бар жерде өркендеу мен болашаққа сенім қалыптасады.
Қазақстандағы достық пен татулық – ата-бабамыздан қалған асыл мұра және оны сақтау – әрқайсымыздың азаматтық борышымыз.
У. Молдахметова, «Pespublica» партиясы» ҚБ мүшесі
