«Көптілділік білім беру ресурстық орталығы» Әл-Фараби атындағы Қазақ Ұлттық Университеті (https://farabi.university) жоғары оқу орнына дейінгі білім беру факультетінің шетелдіктердің тілдік және жалпы білім беру кафедрасында 2017 жылдың 24 шілдесіндегі № 500 бұйрық негізінде ашылды.
«Көптілділік білім берудің Ресурстық орталығы» атты ғылыми-білім беру орталығы әл-Фараби атындағы Қазақ ұлттық университетінің өзін-өзі қаржыландыру негізінде жұмыс істейтін құрылымдық бөлімшесі болып табылады.
Көптілділік білім берудің Ресурстық орталығында қазақ және орыс тілдерін шет тілі ретінде үйреніп тілдік дайындықтан өткісі келетіндерге, шет елден келген студенттердің ойдағыдай білім алуларын жүзеге асыруға барлық қажетті ресурстар қарастырылған.
Орталық оқытушылары қазақ және орыс тілдерін шет тілі ретінде оқытудың, өзге тілді оқытудың заманауи технологиялары мен әдістерін кәсіби түрде игерген. Сонымен бірге орталық оқытушылары тілдерді оқытудың инновациялық технологиялары мен әдістемелерінің авторлары болып табылады.
Орталық қазақ және орыс тілдерін оқытуға арналған оқулықтармен, оқу құралдарымен, сөздіктермен, аудио-видео материалдармен толық жабдықталған. Біздің тыңдаушыларымыздың әл — Фараби атындағы ҚазҰУ мен Қазақстанның басқа Жоғары оқу орындарына түсу, Қазақстанда жұмыс істеу немесе қазақ тілі мен орыс, ағылшын тілдеріне деген құштарлық сияқты түрлі уәждері мен мақсаттары бар. Орталықта оқитын тыңдаушылар 17 мен 70 жас аралығында. Бұлар – болашақ студенттер, ізденуші-зерттеушілер, іскерлер мен дипломаттар және Қазақстанда өкілдігі бар халықаралық компания қызметкерлері, Қазақстанның университеттері мен тілдік мектептерінде жұмыс істеуге келген шетелдік-оқытушылар.
Орталықтың әрбір тыңдаушысына оқытудың жеке қарқыны мен икемді сабақ кестесі іріктеп алынады. Тыңдаушылар өз алдына жеке оқу формасын немесе топпен оқуды таңдай алады.
Біздің орталықта курстар А1 деңгейімен басталып, С2 жоғары деңгейімен аяқталатын Европа кеңесінің шет тілін игерудің Жалпы европалық құзыреттілігінің келісімі бойынша қазақ және орыс тілдері 6 негізгі оқыту деңгейлеріне бөлініп оқытылады.
Орталыққа қабылданар алдында тілдік деңгейді анықтау жүргізіледі, қазақ тілі мен орыс тілдерін қарқынды үйренуге жекеше немесе арнайы бағдарламалар әзірленеді.
Орталық тыңдаушыларына арналған Қазақстан мәдениеті бойынша арнайы курс әзірленген. Олар – Алматы мұражайларына эксурсиялар, табиғат аясында саяхаттар, Іле Алатауы шыңдарын тамашалау, тау-шаңғы курорты Шымбұлақ, Көлсай көлдері және т.б. қазақ қонақжайлығы, ұлттық тағамдар, қазақ халқының салт-дәстүрімен таныстыру сияқты сабақтар.
Дүйсенбаева Р.И., Қазмағамбетова А.С., Айтбаева Б.М.
Әл-Фараби атындағы ҚазҰУ
ЖОО-ға дейінгі білім беру факультеті
шетелдіктердің тілдік және жалпы білім беру
дайындығы кафедрасының оқытушылары
