Өмір дегенің теңіздің асау толқындары сияқты жүйрік-ақ қой шіркін! Кеше ғана осы білім ошағының табалдырығын аттаған сияқты едім… Аз уақыт емес. 30 жыл… Артымда қалған жолға қарап, талай кірбіңі мен қуанышы бар еңселі жылдарды көз алдыма елестетіп отырмын. Осы білім ордасында басталған енбек жолындағы алғашқы күндерімнің айшықты іздеріне қарап, өзіме өзім риза болып, көнілім судай тасып отыр. Неге дейсіз ғой?
Біріншіден, мен еңбек пен ерліктің, азаматтық пен адамгершіліктің үлгісіндей болған жандармен бірге еңбек жолын бастадым. Осында жүріп табиғатпен бірге жаратылған нәзіктік пен сұлулықтың, қайрат пен төзімнің, адалдықтың мәнін ұқтым. Бұл дүниеде адам баласынын жолы бола беретіні екіталай. Табиғат берген дарын ұшқынымен, жолы болып, азамат болып қалыптасуы – ұзақ үдеріс, ұзақ жол. Осы жолда адам болып қалыптасуыңа, өсіп-өнуіңе жақсы адамдар кездессе, өмірдегі жолыңның болғаны. Мен өзімді осындай жолы болған адаммын деп есептеймін. Іштей жаратқан иеме алғыс айтамын…
Алғаш табалдырықтан имене кірген мені көктемнің аппақ қарындай көңілімен, адамға деген ыстық ілтипатпен кафедра меңгерушісі Л.В. Екшембеева қарсы алды. Қалай болар екен деп қиналып кірген мен, кафедра меңгерушісінің ақылға толы ойлы көздері мен нұрға толы жүздеріне қарап, зиялы жерге келгенімді ұқтым. Тағдырыма осындай жаратылысы өзгеше, көкірегі күмбірлеген жақсылыққа толы, жан-жағына жылулық, таратып тұратын жанды жолықтырғаныма осы күнге дейін рахмет айтамын. (https://farabi.university)
Менің жұмысқа орналасайын деп келген жерім шетел азаматтарына арналған дайындық факультеті, қазақ және орыс тілдері кафедрасы болатын. Бұрын бұл оқу орнына шетел азаматтары орыс тілін үйренуге келсе, тәуелсіздіктің туы желбірегеннен кейін қазақ тілін үйренуге шетелдік азаматтардың бой көрсете бастаған жылдар еді. Алғашқыда тәжірибем жоқ болғандықтан мен шетел азаматтарына тіл үйретуден жүрексініп абдырып қалдым. Кафедраға келген күннен бастап мені жылы жүзбен қарсы алған терең білімді, биік мәдениетті, тіл үйрету шеберлігімен дараланған Жанипа Шариповна Ахмедова, Гүлбағиза Мұсаева, Әтіркүл Ағмановалар менің осы ұжымға үйреніп, тіл үйретудің тың әдістемесін меңгеруіме септігін тигізді. Әсіресе, талдырмаш қана Гүлбағизаның ілтипаттылығы, зеректігі, парасаттылығы, ойына алған ісіне жойқын күшпен батыл кірісетіні, сенгіш, албырт, түсінігі мол, жалған сезім мен өтірік мүләйімсу секілді қылықтарға жанының қастығы мені өзіне тәнті етті.
Екіншіден, дәстүрлі қазақ тілін оқыту әдістемесінен басқаны білмейтін маған тіл үйретудің оның ішінде тілді шет тілі ретінде оқыту әдістемесін меңгеру оңайлықпен келмеді. Қиналып, тамшы терімді төгіп еңбек етуге тура келді. Осы тұста шет елден келген тіл үйренушілерге тілді шет тілі ретінде үйретумен қатар анасындай қамқор болып жүрген Ж. Ә. Нұршайықова, У.К Валеева, И.И. Сапронова, Л.С. Торохтий, И.В. Килдюшова, И.В. Мацко, Т.В. Курманова,Т.А. Шуховцова А.С Айтпаева, Х.С. Қаскабасова, Е.А. Пак, Г.Е.Утебалиева, сияқты кафедра оқытушыларының сабақтары маған дем берді, тіл үйретуге деген қызығушылығымды оятты. Оқыта жүріп әдістеменің, тіл оқыту техникасының қыр-сырын үйрене бастадым.
Үшіншіден, қазақ тілі мен орыс тілінің болашағы үшін бар күш-қуатын, ой арманын жұмсаған кафедра меңгерушісі ф.ғ.к. профессор Жанара Әзілхановна Нұршайықованың кафедраны қазіргі заман талабына сай, тілді шет тілі ретінде оқытудың инновациялық-технологиялық, ғылыми-теориялық зерттеу орталығына айналдыруының куәсі болдым. Бұл азғана жылдардың, өз мамандығына шын берілген мамандардың биік мақсаты мен жасампаз істерінің жемісі еді. Қаншама кандидаттық, докторлық диссертациялар жазылып, елімізде бұрын жазылмаған, шетелдіктерге, өзге тілді азаматтарға тіл үйретуге арналған оқулықтар мен оқу құралдары, бағдарламалар мен бақылау тестілері жазылды. Ақиқат пен адалдықты, батылдық пен әділдікті жаны сүйетін, кесек мінез, жан дүниесі пәк, басқаның бәрін өзіндей көретін, сенетін, адам жанына үңіле қарайтын, зерделі, еңбекқор Жанар Әзілхановна Нұршайықованың, одан кейін кафедраны басқарған ф.ғ.к профессор Г.Қ. Ихсанғалиева, профессор А.Е.Саденова жетекшілігімен кафедраның атағы мен абыройы университет көлемінде ғана емес, ресей университеттері мен жақын, алыс шетелге де белгілі болды. Жүлделерге ие болды. Еңбек жанды.
Еліміздің тарихын, мәдениетін, салт-дәстүрін, тілін, даңқын шартарапқа әйгілі ету жолында маңдай тер төгілген, жан аямас өнегелі еңбектің даңғыл жолында өзімнің де ізімді қалдырғаныма көңілім өсіп марқаяды.
Міне бүгінде бұл оқу ордасына 40 жыл толып отыр. Кафедра қазіргі уақытта үлкен тіл үйрету бәйтерегіне айналып, тамырын тереңге жайды. Ой өресі кең, күш-қуаты арналы, ой-арманы ұшқыр Б.М. Айтбаева бастаған кейінгі толқын аға ұрпақтың еңбек жолын қастерлеп, олар бастаған игі дәстүрлерді ілгері дамыту жолында, ғылым мен әдістемені ұштастыра отырып, жасампаздықпен еңбек етуді жалғастыруда.
ЖОО дейінгі білім беру факультеті
Шетелдіктердің тілдік және жалпы білім беру кафедрасының аға
оқытушысы Р.И.Дүйсенбаева
