Степногорск қаласының екі тұрғыны 2025 жылдың 23 қаңтарында кездейсоқ адамдарды қорқытып, ақша талап еткені белгілі болды, деп хабарлайлы altynqala.kz тілшісі.
Ұйымдасқан қылмысқа қарсы күрес басқармасының қызметкерлері осы суыт оқиғаға қатысты жедел-іздестіру шараларын жүргізіп, соның нәтижесінде күдіктілер дереу құрықталды.
Тергеу барысында күдіктілердің ұзақ уақыт бойы қала тұрғындарын қорқытып, оларға психологиялық қысым көрсетіп, кей жағдайда дене жарақатын салып отырғаны белгілі болды. Бопсалаушылар негізінен жергілікті бизнес қызметкерлерін, жүк тасушы қара жұмысшыларды немесе дүкен сатушыларын аңдыған. Қазіргі уақытта үш жәбірленуші анықталып отыр. Басбұзарлардан жапа шеккен жанның бірі – 24 жастағы қала тұрғыны.
Тергеу материалдарына сүйенсек, күдіктілердің бірі бұл жігіттен 80 мың теңге көлемінде ақша талап еткен. Егер талаптары орындалмаса, күш қолданамыз деп, қорқытуға дейін барған. Осыған ұқсас бопсалау әрекеттері қаланың басқа аудандарында да бірнеше рет қайталанғаны белгілі болды. Қазіргі уақытта күдіктілер уақытша ұстау изоляторына қамалып, тергеу амалдары жүргізіліп жатыр. Құқық қорғаушылар қылмыстық кодекстің тиісті баптары бойынша іс қозғалғанын және күдіктілердің басқа да заңсыз әрекеттерге қатысы бар-жоғын тексеріп жатқанын мәлімдеді.
Степногорск қалалық полиция басқармасы азаматтарды сақтық шараларын күшейтуге, кез келген күмәнді әрекеттерді байқаса, дереу 102 нөміріне хабарлауға шақырды. «Құқық қорғау органдары қылмыстық әрекеттерге төзбеушілік танытып, қоғамның қауіпсіздігін қамтамасыз ету үшін барлық қажетті шараларды жасайды. Бұл істің тергеуі толық аяқталғанша, басқа да жәбірленушілердің болуы мүмкін екенін жоққа шығармаймыз», деді полиция өкілдері. Осы оқиға қоғамдық қауіпсіздіктің маңыздылығын тағы бір рет көрсетті. Құқық қорғау органдары қылмыстың алдын алу және азаматтардың қауіпсіздігін қамтамасыз ету бағытында жұмысын жалғастыруда.
