15 ақпан күні Кеңес әскерлерінің Ауғанстан аумағынан шығарылғанына 36 жыл толуына арналған еске алу рәсімі өтті. Іс-шара Ауған соғысы ардагерлерінің аллеясында ұйымдастырылып, оған соғыс ардагерлері мен қала тұрғындары қатысты, деп хабарлайды altynqala.kz
Жиналғандар майдан даласынан оралмаған жауынгерлердің рухына тағзым етіп,
ескерткішке гүл шоқтарын қойды. Рәсім барысында жүректі тербеткен әсерлі әндер шырқалды. Қатысушылар соғыста қаза тапқандарды бір минут үнсіздікпен еске алды. Бұл сәт жиналғандардың жүрегіне ерекше әсер етіп, олардың жан дүниесін тебірентті. Шараның мақсаты – батырлардың ерлігін ұмытпай, олардың көрсеткен
қаһармандығын кейінгі ұрпаққа үлгі ету.Еске алу рәсімі – ардагерлер мен тұрғындар үшін тек қаралы күн ғана емес, сонымен қатар бейбітшіліктің, достықтың қадірін ұғындыратын маңызды сәт болды.
Бұл еске алу рәсімі өткен тарихтың жан ауыртар сәттерін ұмытпауға шақырып қана қоймай, ерлік пен батылдықтың мәңгілік екенін тағы бір мәрте дәлелдеді. Ең бастысы, бейбіт күннің қадірін білуді ұрпақ
санасына сіңірудің маңызды екендігін еске салды.
