Ерейментау станциясының электровоз машинисі Сергей Щеголев Қазақстан Президентінің қолынан «Ерен еңбегі үшін» медалін алды, деп хабарлайды ALTYNQALA.KZ ақпарат агенттігі.
Сергей Геннадьевич Щеголев – «ҚТЖ-Жүк тасымалы» АҚ Екібастұз пайдалану локомотив депосының тәжірибелі электровоз машинисі. Ол 1971 жылдың 3 қазанында Ақмола облысының Шортанды ауылында дүниеге келген. Салалық еңбек өтілі – 30 жылдан астам, осы уақыттың барлығын темір жол саласына арнаған.
Еңбек жолында Сергей Щеголев өзін жоғары білікті әрі жауапты маман ретінде көрсете білді. Ол жас кадрларға тәлімгер болып, 10 машинист пен 8 электровоз көмекшісін оқытып шығарған.
Оның штаттан тыс жағдайдағы сауатты әрекеттері ерекше атап өтіледі. Өткен жылдың ақпан айында Сергей Щеголев пен оның бригадасы Ерейментау станциясында М48 маневрлік бағдаршамының тыйым салатын сигналына өтіп кетудің алдын алып, пойыздардың қауіпсіз қозғалысын қамтамасыз етіп, ықтимал салдардың жолын кесті.
Депо ұжымы Сергей Щеголевті «өз ісінің шебері, мұқият әрі қамқор адам» деп сипаттайды. Оның кандидатурасын локомотив депосының ұжымы бірауыздан қолдаған.
Президент тапсырған марапат – теміржолшының көп жылғы адал еңбегінің, сондай-ақ еліміздің көлік саласындағы қауіпсіздік пен дамуға қосқан жеке үлесінің мойындалуы.
