Степногорск қаласында көпбалалы ана мемлекеттік марапатқа ие болды. Қазақстан Республикасы Президентінің 2025 жылғы 30 мамырдағы №894 Жарлығына сәйкес, алты бала дүниеге әкеліп, тәрбиелегені үшін Надырбаева Шынар Аманбаевна «Күміс алқа» белгісімен марапатталды, деп хабарлайды ALTYNQALA.KZ ақпарат агенттігі.
Марапатты салтанатты жағдайда қала әкімдігі атынан тапсырып, жергілікті атқарушы орган өкілдері ананың еңбегіне алғыс білдірді. Шынар Аманбаевнаға гүл шоқтары ұсынылып, жылы лебіздер айтылды.
Бұл марапат – тек бір ананың ғана емес, барлық көпбалалы аналарға көрсетілген құрметтің жарқын көрінісі. Отбасы құндылықтарын ұлықтап, ұрпақ тәрбиесіне сүбелі үлес қосып жүрген аналардың еңбегі ел назарынан тыс қалмақ емес.
Айта кету керек, «Күміс алқа» – көпбалалы аналарға берілетін мемлекеттік награда. Ол ана мәртебесін көтеріп, қоғамдағы рөлін айқындай түсетін маңызды марапаттардың бірі.
