«Степногорск тау-кен химиялық комбинаты» ЖШС – Қазақстанның экономикалық және әлеуметтік дамуына зор үлес қосып отырған еліміздегі заманауи, алдыңғы қатарлы кәсіпорындарының бірі. Ол Қазақстандағы ең ірі уран өндіруші зауыт болып табылады. Уран кенін өндіріп, оны өңдеумен айналысатын комбинатта саналы ғұмырының басым бөлігін осы салаға арнаған жұмысшы мамандар аз емес. Солардың бірі – басқару пультінің операторы Айгүл Қажығалиқызы Әлімқайдарова. Жиырма жылдан бері кәсіпорында осы мамандық бойынша еңбек етіп келе жатқан жан өз ісінің нағыз шебері болып қалыптасты. Биылғы «Жұмысшы мамандықтар жылы» аясында осы кісінің өнегесін жастарға үлгі етіп, атқарған адал ісін көпшілікке насихаттау мақсатында өзімен сұхбаттасуды жөн санадық, деп жазды «Altyn Qala» Степногорск қаласының, әлеуметтік экономикалық, қоғамдық саяси газеті.
– Туып-өскен жеріңіз, өскен өңіріңізден әңгіме төркінін бастасақ…
– Мен үлкен әулеттің ерке қызымын. Туған жерім – Ақсу өңірі. Ата-анадан сегіз ағайындымыз. Мен үйдің сүт кенжесімін. Әкемнің дүниеден өткеніне он бес жылдай уақыт өтіпті. Ал анам сексен алты жасқа келіп, өмірден озды. Бірлігі мен берекесі жарасқан, «Төртеу түгел болса, төбедегі келеді» дейтіндей, ауызбіршілігі мықты отбасымыз. Ағайынның арасында қандай да бір жағдай бола қалса, ұйымшылдықпен шешуге барымызды саламыз. Өйткені ата-анамыздың берген тәрбиесі сондай. Азаматым да өмірден ерте кетті. Үш ұлымды аяқтандырамын деп бірнеше жерде барымды салып еңбек еттім. Аллаға тәуба, қазір ұлдарым үлкен азамат болды, өз алдына шаңырақ құрды. Немере сүйген бақытты әжемін. Ағайын-туыс, бауырларым қасымда, бәріміз бір қалада тұрамыз. Ата-анамның ізін жалғаған бауырларым, жеңгелерім кез келген сәтте қолдап, бір жағадан бас, бір жеңнен қол шығарып, демеп отыратындығын ерекше атап өткім келеді.
– Мамандығыңыз қандай, зауытқа қалай келдіңіз?
– Зауытқа 2005 жылы келдім. Молибден өндіретін цех ашылғанда флотатор болып қызметке қабылданған болатынмын. Одан кейін алтын өндіру ісіне кірістік. Қазір мыс концентратын өндіру жұмысын жүргізіп жатырмыз. Технологияны жақсы меңгерген маман ретінде операторлық қызмет ұсынылды. Бір жағынан жасымыз да келгендіктен, флотатор болу да ауыр. Сондықтан шешімді тез қабылдап, жаңа жұмысқа кірісіп кеткеніме де біраз болды.
–
– Жұмыстан бос уақытымда жаныма спортты серік етуге тырысамын. Ойыңды, бойыңды сергек ұстау үшін спорт өте маңызды. Мектеп жасынан бері жүгіру, үстел теннисі ұнайтын. Содан әлі күнге дейін спорттың осы түрін қатты жақсы көремін. Облыстық жарыстарда бақ сынап жүрміз. Жаңа жыл қарсаңында үстел теннисінен екінші орын алдық.
– Зауыт мамандардың біліктілігін арттыру бағытында қандай жұмыстар жүргізіп отыр?
– Бізде білікті және тәжірибелі мамандар жұмыс істейді. Мұнда қызметкерлердің кәсіби деңгейін арттыру үшін арнайы оқу бағдарламалары қарастырылған. Комбинат экологиялық қауіпсіздікке үлкен мән береді. Сондықтан жұмыс барысында қоршаған ортаны қорғау талаптары қатаң сақталып, осы мақсатта түрлі шаралар да тұрақты өткізіліп тұрады. Әлеуметтік жауапкершілігі бар кәсіпорын ретінде комбинат қаланың және аймақтың әлеуметтік-экономикалық дамуына белсенді қатысып отыр деуге толық негіз бар.
– Ал саяхаттау несімен ұнайды?
– Өзге жұрттардың салт-дәстүрін, тіршілігі мен өмір қағидасын түсіну үшін ел мен жер көріп, саяхаттағанды жақсы көремін. Жазда Қырғыз елінде болдым, жақында Египетке саяхаттап бардым. Мәскеу, Новороссийск, Алматы қалаларын көріп келдім. Әр елдің табиғи сұлулығын тамашалап, ішкі мәдениетіне сусындаудың өзі қызық. Маған, әсіресе, Ежелгі Мысыр мәдениеті қатты ұнады. Алдағы жоспарыма сол елге қайта баруды енгізіп отырмын. Жаңа жерлерді көру, жаңа адамдармен танысу, жаңаша әсер алу, демалу, күнделікті қарбалас тіршіліктен тынығу өмірлік жоспарыңа да үлкен өзгеріс әкелетініне әбден көз жеткізгендеймін. Сондықтан болар саяхаттаған қатты ұнайды. Әр түрлі тағамның дәмін татып, түрлі елдің әуенін тыңдағанның өзі қандай тамаша!
– Еңбегіңіз жемісті болсын, әңгімеңізге көп рақмет!
Әңгімелескен Гүлназ Бисен, Бас редактордың орынбасары.
