Степногорск қаласында Әкелер күніне арналған дөңгелек үстел өтті, деп хабарлайды ALTYNQALA.KZ ақпарат агенттігі.
2025 жылдың 13 маусымында Степногорск қаласындағы «Горняк» мәдениет үйінің кіші залында ерекше тағылымы мен тәрбиелік мәні зор шара – Әкелер күніне арналған дөңгелек үстел өтті. Бұл жиын маусым айының үшінші жексенбісінде аталып өтетін халықаралық Әкелер күніне орай ұйымдастырылды.
Іс-шараны Степногорск қаласының әкімдігі мен қалалық жұмыспен қамту және әлеуметтік бағдарламалар бөлімінің «Отбасыларды қолдау және сүйемелдеу орталығы» бірлесе ұйымдастырды. Мақсат – отбасы институтын нығайту, әке рөлін дәріптеу және отбасындағы әкелердің тәрбиелік миссиясын қоғамда кеңінен насихаттау.
Қазіргі уақытта әлемде жақсы бір дәстүр қалыптасты – маусымның үшінші жексенбісінде Әкелер күні тойланады. Бұл күн – әкелерге деген алғыс пен ризашылықты білдірудің тамаша мүмкіндігі. Әке болу – тек биологиялық байланыс емес, бұл – күнделікті қажырлы еңбек пен үлкен жауапкершілік. Әке – отбасына тірек, балаларына бағыт-бағдар беруші, өмірлік ақылшы. Әрбір бала әкесінің сүйіспеншілігін, қамқорлығын, мейірімін сезінуі тиіс. . Дөңгелек үстелге арнайы шақырылған құрметті қонақ – Степногорск қаласы әкімінің орынбасары Жанасыл Сабырұлы қатысып, өз сөзінде әкелердің қоғамдағы орны, жас ұрпақты тәрбиелеудегі үлесі туралы ой өрбітті. Ол қатысушыларды мерекемен құттықтап, отбасы құндылықтарының тұрақтылығы мен қоғамдағы әке бейнесінің маңыздылығына тоқталды.
Іс-шара барысында бала тәрбиесі мен қоғамдық өмірде белсенділік танытып жүрген бірқатар азаматтар қала әкімінің алғыс хаттарымен марапатталды.
Олардың қатарында:
1. Капезов Ахат Орынбайұлы – Степногорск қаласының білім бөлімі жанындағы қалалық ата-аналар комитетінің төрағасы;
2. Назаров Нұрхат Жеңісұлы – «Viamedis» ЖШС қалалық филиалының дәрігері;
3. Шоқпаров Бахтияр Төрекұлұлы – Степногорск қалалық полиция басқармасы бастығының орынбасары;
4. Аубакиров Еркеғали Қасымханович – Қорғаныс істері жөніндегі басқарма бастығы;
5. Исаев Қайролла Ахметұлы – Степногорск қаласы ақсақалдар кеңесінің төрағасы;
6. Аубакиров Медет Дәулеткелдіұлы – Степногорск қаласының бас имамы;
7. Алхастов Замбек Хасамбектұлы – Шешен-ингуш этномәдени бірлестігінің төрағасы.
“Бұл азаматтардың әрқайсысы тек өз отбасында ғана емес, бүкіл қала көлемінде өнегелі әке, үлгілі азамат ретінде танылып келеді. Барша әкелерге балаларының өміріне белсенді араласуға, олардың бастамаларын қолдауға, қауіпсіз әрі қолайлы орта құруға шақырамын. Сіздердің отбасы алдындағы жауапкершіліктеріңіз – қоғамның негізін қалайды. Әрбір бала әкесінің қамқорлығын, қолдауын сезініп өсуі тиіс. Әкелер күні құтты болсын! Сіздерге зор денсаулық, ұзақ ғұмыр және бала тәрбиесіндегі еңбектеріңізге табыс тілейміз”, – деген жүрекжарды тілегін Жанасыл Сабырұлы жеткізді
Сонымен қатар тақырыптық баяндамалар оқылып, пікір алмасулар ұйымдастырылды Дөңгелек үстел аясында қоғамда әке бейнесінің өзгеруі, олардың тәрбиелік рөлі, отбасылық жауапкершілік пен заманауи қиындықтар туралы мазмұнды баяндамалар ұсынылды. Қатысушылар өз тәжірибелерімен бөлісіп, бір-біріне пайдалы кеңестер берді. Іс-шара шынайы әрі жылы жүздесу алаңына айналды. Қатысушылар мұндай игі бастамалар отбасы мәртебесін арттыруға және жас ұрпақты тәрбиелеуде әкелердің белсенділігін көтеруге оң ықпал ететінін атап өтті.
Бүгінгі әке – тек асыраушы ғана емес, жан дүниені түсінетін қамқоршы, өмірлік дос әрі ақылшы. Қоғамның тыныштығы мен тұрақтылығы, мемлекеттің келешегі отбасы мен онда тәрбиеленген ұрпаққа тікелей байланысты. Ал отбасының берік болуы – отағасы мен отанасының, соның ішінде, әкенің парасатына тікелей байланысты.
«Отан – отбасыдан басталады» демекші, осындай шаралар еліміздегі отбасы құндылықтарының дамуына, ұрпақ тәрбиесінің сапалы болуына үлкен сеп болмақ.
