«Горняк» мәдениет үйінде ұйымдастырылған жиын «Білім келешегі: Адал азамат, кәсіби маман» тақырыбымен өтті. Конференцияға қала әкімі Гайдар Қабдоллаұлы, қалалық мәслихат төрағасы Олжас Аманжолұлы, білім бөлімінің басшысы Алтын Қабдырашитқызы және ұстаздар қауымы қатысты.
Басты бағыттар мен жаңа жобалар
Қалада 21 білім мекемесінде 3 мыңға жуық бала тәрбиеленуде. 2025 жылы балаларды қамту үлесін 97 пайызға жеткізу көзделіп отыр. Бұл мақсатта ваучерлік қаржыландыруға көшу жоспарланған. «Балдырған» және «Балауса» балабақшаларында «Тілге бойлау» жобасы іске асуда.
Жаңа оқу жылында 21 мектепте 10 мыңға жуық оқушы білім алмақ. Ыбырай Алтынсарин атындағы №1 мектеп күрделі жөндеуден өтті, ал Заводской кентінде және №9 мектепте инклюзивті білім беру кабинеттері ашылады. «Ауыл мектебі – сапа алаңы» жобасы да қыркүйектен бастап жүзеге асады.
Цифрландыру және жаңа технологиялар
Президент тапсырмасына сай қала мектептерінде цифрлық технологиялар белсенді енгізілуде. 9 мектепке аппараттық-бағдарламалық кешен орнатылды, 12 мектепте «Бизнес әмиян» қосымшасы қолданысқа енгізілді. Мұғалімдер сабақтарда жасанды интеллектті қолдануды бастап кетті.
Жетістіктер мен марапаттар
Өткен оқу жылында қала оқушылары түрлі деңгейдегі олимпиада мен байқауларда 1778 жүлделі орынға ие болды. Оның ішінде 442 алтын, 545 күміс және 791 қола медаль бар. Бірқатар түлектер жоғары оқу орындарына грант иеленді.
