Дала төсіндегі науқан – шаруалар үшін ең жауапты әрі сындарлы кезеңдердің бірі. Өйткені бір жыл бойғы маңдай тердің, үздіксіз еңбектің жемісі осы сәтте айқындалады. Биыл өңірде ауыл шаруашылығы дақылдары 10 мың гектарға егілген. Бұл – өңірдің ауыл шаруашылығы саласындағы әлеуетін ғана емес, жергілікті тұрғындарды сапалы әрі мол астықпен қамтамасыз етуге бағытталған нақты қадамдардың бірі болып отыр.
Қала әкімінің орынбасары Фархат Байқасов арнайы шаруашылықтарға барып, егін орағына дайындық барысымен танысты. Әкімдік өкілінің айтуынша, басты назар уақытты тиімді пайдаланып, өнімді жоғалтпай жинап алуға аударылуда. Осы орайда, ауыл шаруашылығы тауар өндірушілері өздеріне тиесілі техникаларын толықтай әзірлеп қойған. Қазіргі таңда комбайндар, тракторлар және басқа да жұмыс құралдары түгел тексерістен өткізіліп, іске жарамды күйге келтірілген. Бұдан бөлек, мемлекет тарапынан шаруаларға арзандатылған жанар-жағармай қоры бөлініп, жеткілікті деңгейде қамтамасыз етілген. Бұл жағдай диқандардың алаңсыз еңбек етуіне, жұмысты тиімді әрі уақытылы жүргізуіне үлкен мүмкіндік бермек.
Әсіресе, “Береке” шаруа қожалығының дайындығы айрықша. Мұндағы шаруалар астықты дер кезінде жинап алу үшін ұйымдастыру шараларын күшейтіп, техниканы барынша жұмылдырып, адам күшін де толық қамтып отыр. Шаруашылық иелерінің айтуынша, олардың негізгі мақсаты – әрбір дәнді ысырапсыз жинап, мол өнімді қамбаға жеткізу. Бұл бағытта жауапты жұмыстар бір сәтке де тоқтаған емес.
Жергілікті билік өкілдері де егіншілердің еңбегін бағалап, олармен пікір алмасып, алдағы науқан барысына ерекше назар аударуда. Егін орағы – ауыл еңбекторысы үшін нағыз сын. Әрбір шыққан астықтың артында диқандардың маңдай тері, қажырлы еңбегі, сондай-ақ елдің азық-түлік қауіпсіздігі жатыр. Сондықтан бұл науқан тек шаруалар үшін ғана емес, бүкіл өңір халқы үшін маңызды.
Степногорск аймағында еңбекке адал берілген егіншілердің арқасында елдің ырысы артып, ауыл экономикасы дамып келеді. Қамбаға құйылған әрбір қап астық – елдің берекесі мен тоқшылығының кепілі. Егіншілердің табанды еңбегі алдағы уақытта да өңірдің әлеуметтік-экономикалық дамуына жаңа серпін берері сөзсіз.
