Тамыз айының екінші жексенбісінде елімізде дәстүрлі түрде аталып өтетін Құрылысшылар күніне орай Ақмола облысының бірнеше қаласында салтанатты іс-шаралар ұйымдастырылды. Облыс орталығы Көкшетауда өткен мерекелік шараға облыс әкімі Ермек Маржықпаев қатысты. Ол сала мамандарын кәсіби мерекелерімен құттықтап, олардың ел дамуына қосқан зор үлесін атап өтті.
– Құрылысшылар – жайлы және сапалы өмірдің негізін қалаушылар. Сіздердің еңбектеріңізбен қалаларымыздың келбеті жасалып, әлеуметтік нысандар мен тұрғын үйлер салынуда, – деді облыс әкімі.
Степногорск қаласында да құрылысшылар күніне арналған салтанатты жиын өтті. Қала басшылығы мерекеге жиналған сала мамандарын құттықтап, олардың қаланың дамуына қосқан үлесін жоғары бағалады. Мерекелік шара барысында салаға сіңірген еңбегі үшін бірқатар ардагерлер мен құрылысшылар марапатталды. Олардың қатарында Чернобыль мен Спитак апаттарын қалпына келтіруге қатысқан Виктор Бондарь, өндіріс-техникалық бөлімнің инженері әрі шебері Алия Моисеева және алғашқы құрылысшылар – Кулпаш Садырова, Николай Четырев, Владимир Козейчук, Петр Немков, Галина Шелудько сынды азаматтар бар.
Мерекелік кеш шымылдығын қала әкімінің орынбасары Фархат Байқасов құттықтау сөзімен ашты. “Қаламыздың келбетін айшықтап, тұрғындарымыздың өмір сүру сапасын жақсартуға күн сайын үлек қоып жүрген құрылысшылардың кәсіби мерекесі құтты болсын! Құрылыс тек кірпіш қалау немесе қабырға тұрғызу ғана емес, ол елдің ертеңіне қаланған берік іргетас”- деп өз құрметін білдірді. Сонымен қатар концерттік бағдарлама ұсынылып, одан кейін құрылыс саласының өзекті мәселелері мен даму қарқыны талқыланған пікір алмасу өткізілді.
Ақмола облысында құрылыс саласы экономикадағы маңызды орынға ие. Биыл салаға бөлінген қаржы көлемі 17 миллиард теңгеге жуықтап, 45 пайызға артты. Соңғы үш жылда өңірде 2 миллион шаршы метрден астам тұрғын үй пайдалануға берілді. Қазіргі уақытта 51 тұрғын үйдің құрылысы жүргізілуде, оның 15-і биыл аяқталады деп жоспарланған. Сонымен қатар, өңірде мектептер, балабақшалар, медициналық мекемелер секілді әлеуметтік нысандар да белсенді тұрғызылуда. Степногорск қаласы аумағында бой көтергелі жатқан бірнеше нысандар да бар екені мәлім және ол нысандар құрылысшы мамандарының қажырлы еңбегінің нәтижесінде ел игілігіне берілетіні хақ.
Құрылысшылар күні – бұл сала мамандарының қажырлы еңбегін атап өту ғана емес, сонымен бірге олардың ел игілігіне қосқан үлесін мойындау күні. Осы мерекеде барлық құрылысшыларға денсаулық, шығармашылық табыс және жаңа жобаларда сәттілік тілейміз.
