2025 жылғы 12 тамызда «AMANAT» партиясы Степногорск аумақтық филиалының қоғамдық қабылдау бөлмесінде азаматтарды жеке қабылдау өтті. Қабылдауды Степногорск қаласының әкімі Қасенов Гайдар Қабдоллаұлы жүргізді. Қоғамдық қабылдаудың басты мақсаты – тұрғындардың күнделікті өміріндегі өзекті мәселелерді тікелей билік өкілдеріне жеткізуге мүмкіндік жасау, сонымен қатар оларды шешу жолдарын бірге қарастыру болып табылады.
Кездесу барысында қала тұрғындары негізінен әлеуметтік-тұрмыстық және коммуналдық салаға қатысты сұрақтар көтерді. Атап айтқанда, тұрғын үй-коммуналдық шаруашылығы, көпқабатты үйлердің жөндеу жұмыстары, аулаларды абаттандыру, қоғамдық көлік мәселесі мен қала инфрақұрылымын дамытуға байланысты өтініштер айтылды. Әкім әрбір азаматтың мәселесін мұқият тыңдап, нақты жауаптар берді. Жеке қабылдауға келген тұрғындарға қойылған сұрақтар бойынша жан-жақты түсініктемелер ұсынылды. Сонымен қатар, көтерілген мәселелерді шешу үшін тиісті қалалық құрылымдардың басшыларына нақты тапсырмалар берілді. Қала әкімі тұрғындардың өтініштері назардан тыс қалмайтынын, олардың шешімі жергілікті атқарушы органдардың тұрақты бақылауында болатынын атап өтті.
