12 тамыз күні Қажымұқан алаңында Дүниежүзілік жастар күніне арналған және жұмысшы мамандықтар жылы аясында мерекелік іс-шара өтті. Бұл — жастардың жаңа идеяларымен, батыл армандарымен және болашаққа деген сенімді көзқарасымен ерекшеленетін күн. Елдің болашағы саналатын жастар — жаңа тарихты қалыптастырып, мәдениет пен ғылымды дамытатын, спорт пен өнерді насихаттайтын басты күш.
Мерекелік концерттік бағдарлама мәдениет бөлімінің шығармашылық ұжымдары ұсынған түрлі өнер нөмірлерімен әрленді. Сонымен қатар, қаланың Жастар ресурстық орталығымен бірлесіп жастарға арналған ашық аспан астындағы көңілді дискотека ұйымдастырылды. Жиынға қала әкімі аппаратының өкілдері, қоғам белсенділері және түрлі ұйымдардың мүшелері қатысты. Іс-шара барысында Фархат Байқасов сөз сөйлеп, қаламыздың дамуына елеулі үлес қосқан, белсенділік танытқан жастарды алғыс хаттармен марапаттады.
Бұл мереке жас ұрпақтың бастамаларына қолдау көрсетіп қана қоймай, олардың бойына сенім, жігер және жаңа белестерді бағындыруға деген ынта сыйлады. Степногорск жастары алдағы уақытта да қаланың қоғамдық, мәдени және әлеуметтік өміріне белсене араласатынын жеткізді.
