Биылғы конференция «Білім келешегі: адал азамат, кәсіби маман» тақырыбымен өтуде
15 тамыз күні Мемлекет басшысы Қасым-Жомарт Тоқаев ұстаздардың дәстүрлі Республикалық тамыз конференциясына қатысты. Ауқымды іс-шара еліміздің білім беру жүйесіндегі өзекті мәселелер мен келешекке бағытталған реформаларды талқылауға арналды.
Биылғы конференция «Білім келешегі: адал азамат, кәсіби маман» тақырыбында өтіп жатыр. Бұл – білім беру саласының басты миссиясы – жас ұрпақты тәрбиелеу мен сапалы білім беру арқылы еліміздің болашағын қалыптастыруға бағытталғанын көрсетеді.
Президент өз сөзінде ұстаздардың қоғамдағы ерекше рөлін атап өтіп, олардың еңбегін жоғары бағалады. Сонымен қатар, білім сапасын арттыру, мұғалім мәртебесін көтеру, оқу бағдарламаларын жаңғырту және жаңа буын мамандарын даярлау бағытында нақты тапсырмалар берді.
«Білім – ұлт болашағының негізі. Қазіргі заманда адалдық пен кәсібилікке негізделген сапалы білім беру – ел дамуының шешуші факторы», – деді Қасым-Жомарт Тоқаев.
Сондай-ақ Президент білім саласындағы цифрландыру, мұғалімдердің біліктілігін арттыру, ауыл мектептерін қолдау және мектеп инфрақұрылымын жақсарту мәселелеріне ерекше назар аударды.
Тамыз конференциясына еліміздің барлық өңірінен педагогтер, білім саласының ардагерлері мен сарапшылар, сондай-ақ министрлік өкілдері қатысты. Іс-шара аясында тәжірибе алмасу, үздік педагогикалық жобаларды таныстыру және панельдік сессиялар өткізілуде.
