Қазақстандық спортшылардың халықаралық аренадағы табысты өнерін ынталандыру мақсатында Мемлекет басшысының тапсырмасына сәйкес Үкімет қаулысымен IX қысқы Азия ойындарында көзге түскен спортшылар мен жаттықтырушыларды марапаттауға 372,6 миллион теңге бөлінді, деп хабарлайды ALTYNQALA.KZ ақпарат агенттігі.
Қаржылай сыйақыны Қытайдың Харбин қаласында өткен Азия ойындарында ұлттық құраманың табысты өнер көрсетуіне зор үлес қосқан 85 спортшы мен 32 жаттықтырушы алды.
Қазақстан құрамасы бұл додада жалпы саны 20 медаль иеленді:
-
4 алтын,
-
9 күміс,
-
7 қола,
Осының нәтижесінде ел құрамасы 34 мемлекеттің ішінен төртінші орынға ие болды.
Алтын медальдар ел қоржынына келесі спортшылар мен командалар тарапынан түсті:
-
биатлоншы Владислав Киреев,
-
ерлер құрамасы хоккейден,
-
фристайл-акробатика бойынша спортшылар,
-
және шорт-трек құрамасы, 5000 метрлік олимпиадалық қашықтықта тарихи жеңіске жетті.
Мемлекеттік қолдау – спортты дамытудың кепілі
Жеңімпаздар мен жүлдегерлерді марапаттау – Мемлекет басшысы бастамасымен жүзеге асырылып жатқан спортты дамытудың кешенді мемлекеттік саясатының бір бөлігі.
Соңғы 6 жылда елімізде:
-
314 дене шынықтыру-сауықтыру кешені,
-
58 жүзу бассейні салынды.
Осының арқасында тұрақты түрде спортпен айналысатын азаматтардың үлесі:
-
2018 жылы – 31,5% (5,9 млн адам) болса,
-
2024 жылы – 41,4% (8,4 млн адам) жетті.
Бұл спорт инфрақұрылымына салынған инвестицияның елдің денсаулығы мен өмір сапасын арттыруға оң әсер еткенін көрсетеді.
Басты назар – балалар мен жасөспірімдер спортына
2021 жылы Президент тапсырмасы бойынша спорттық секцияларға жан басына қаржыландыру тетігі заңмен бекітілді. Бүгінде елімізде 4 пен 17 жас аралығындағы 250 мыңнан астам бала мен жасөспірім спортпен тұрақты түрде айналысады. Олар 7000-нан астам спорт секцияларында тәрбиеленіп жатыр.
Соңғы 5 жылда:
-
балалар мен жасөспірімдер спорт мектептерінің саны – 481-ден 521-ге өсті,
-
спорттық дайындықпен қамтылған балалар саны – 357 мыңнан 406 мыңға дейін артты.
Бұл кешенді әрі жүйелі жұмыс мемлекетіміздің салауатты, белсенді және бәсекеге қабілетті ұлт қалыптастыруға бағытталған стратегиясының жемісі болып табылады. Бүгінде спорт – әрбір қазақстандықтың өміріндегі маңызды құндылықтардың біріне айналуда.
