ТБИЛИСИ (Грузия). Қазақстанның семсерлесуден (шпага) ерлер құрамасы алғаш рет әлем чемпионатының командалық жарысында қола медаль еншіледі, деп хабарлайды ALTYNQALA.KZ ақпарат агенттігі.
Командалық сынға еліміздің намысын қорғауға Руслан Курбанов, Вадим Шарлаимов, Эльмир Алимжанов және Кирилл Проходов шықты.
Үшінші орын үшін тартысты бәсекеде қазақстандықтар әлемнің үздік құрамаларының бірі – Франция командасымен кездесіп, сенсациялық нәтижеге қол жеткізді.
Кездесу басынан бастап біздің спортшылар айқын басымдық танытып, есепті алға қарай жылжытумен болды. Қорытынды есеп – 45:31, Қазақстанның айқын жеңісі.
🔹 Бұл – еліміздің семсерлесу тарихындағы әлем чемпионаттарындағы алғашқы командалық жүлде.
Айта кету керек, 2023 жылы Руслан Курбанов жеке сын бойынша да әлем чемпионатында елге алғашқы қола медаль сыйлаған болатын.
📌 Бұған дейін грек-рим күресінен жастар арасындағы әлем чемпионатында Жанажол Қуанышбек алтын жүлдеге ие болғанын хабарлағанбыз. Ол дода Грекияда өтті.
