Beeline Arena ұлттық теннис орталығының корттарында ATP Challenger сериясындағы Президент Кубогы турнирі жалғасуда. Турнир күнінің басты жаңалықтарының бірі – 17 жастағы қазақстандық теннисші Зангар Нұрланұлының сенімді ойыны болды, деп хабарлайды ALTYNQALA.KZ ақпарат агенттігі.
Жұптық сында Зангар словакиялық теннисші Михал Крайчимен бірге өнер көрсетіп, өзінің Challenger деңгейіндегі алғашқы жеңісіне қол жеткізді. Олар бірінші айналымда поляк-үнді жұбы – Олаф Печковски / Каран Сингхті 6:4, 6:1 есебімен айқын ұтты.
Зангар кортта нағыз көшбасшыға тән ойын көрсетті – сенімді, батыл әрі шешуші сәттерде бастаманы өз қолына алып, қарсыластарын қапы қалдырды.
Ширек финалда қазақстандық-словакиялық дуэтті мықты қарсыластар күтіп тұр – жарыстың үшінші нөмірлі жапон жұбы Таисэй Ишикава / Кокоро Исомурамен кездесу жоспарланған.
Айта кетейік, тағы бір қазақстандық теннисші Григорий Ломакин австралиялық Эдвард Уинтермен жұптасып, ширек финалға жолдама алды. Олар алғашқы айналымда тайлық Максимус Джонс пен грузиялық Саба Пурцеладзені 6:3, 7:6(7:1) есебімен жеңді.
Келесі кезеңде Ломакин/Уинтер жұбы екінші нөмірлі жапон спортшылары Кусухара / Накагавамен кездеседі.
