Қазақстан дұрыс бағытта дамып келеді — бұл пікірмен респонденттердің 79,4%-ы келіседі. Мұндай дерек Саяси қоғамдық институттың 2025 жылғы маусым айындағы әлеуметтік зерттеу қорытындысында келтірілген. Бұл қоғамда қалыптасқан тұрақты көзқарас пен қазіргі мемлекеттік курстың кеңінен қолдау тауып отырғанын көрсетеді.
Зерттеу нәтижесіне сәйкес, халықтың елдегі әлеуметтік-экономикалық жағдайға қатысты бағасы да жоғары. Атап айтқанда, сұралғандардың 73,6%-ы қазіргі экономикалық ахуалды оң деп бағалаған. Бұл — азаматтар арасында тұрақтылыққа деген сенімнің нығайып келе жатқанын білдіретін маңызды көрсеткіш.
Саяси ахуалға қатысты да оң пікірлер басым: респонденттердің 76,2%-ы еліміздегі саяси тұрақтылық пен жүргізіліп жатқан реформаларға қанағаттанатындарын білдірген.
Халықтың оң бағасына не себеп?
Мұндай жоғары қоғамдық қолдауға бірнеше фактор ықпал етіп отыр. Солардың қатарында:
•Ішкі жалпы өнімнің (ЖІӨ) 6%-ға өсуі,
•Жаңа әлеуметтік және инфрақұрылымдық нысандардың құрылысы мен іске қосылуы,
•Тұрғын үй-коммуналдық шаруашылық пен көлік инфрақұрылымын жаңғырту,
•Азаматтардың әл-ауқатын жақсартуға бағытталған мемлекеттік бастамалар бар.
Зерттеу нәтижелері қоғамдық келісім мен тұрақтылықтың сақталып отырғанын, сонымен қатар билікке деген сенім деңгейінің жоғары екенін көрсетіп отыр. Бұл еліміздің одан әрі дамуына берік негіз болары сөзсіз.
