Баку, 25 шілде, AЗЕРТАДЖ
Әзербайжан Республикасының Мемлекеттік мұнай қоры (АРММҚ) табиғи ресурстардың сарқылуынан түсетін кірістерді жинақтап, оларды қазіргі және болашақ ұрпақ үшін тұрақты табыс көзіне айналдыру мақсатында құрылған. Өткен жылы 25 жылдығын атап өткен Қор бүгінде 66 миллиард АҚШ долларынан астам активтерді басқарып отыр. Бұл Әзербайжанның ЖІӨ-сінің 90 пайызынан астамына тең. 2024 жылғы инвестициялық табыстылық 6 пайызды құрады.
AЗЕРТАДЖ агенттігінің хабарлауынша, қаржы нарықтарында ұзақ мерзімді капитал жеткізушісі ретінде Қор қазіргі және келешек ұрпақтың әл-ауқатын арттыруға, сондай-ақ жаһандық тұрақты дамуға инвестициялық қызметі арқылы үлес қосып келеді. Мақсаттарына жету үшін АРММҚ 50-ден астам елді қамтитын, негізгі қаржы құралдары мен секторларды біріктіретін, тұрақты әрі икемді инвестициялық стратегияға негізделген жоғары деңгейде әртараптандырылған инвестициялық портфельге ие.
Қор өзінің инвестициялық портфелін озық тәжірибе мен кәсіби басқару қағидаттарына сүйене отырып қалыптастырады және алдағы кезеңдердегі макроэкономикалық үрдістерді – энергетикалық ауысу, цифрландыру, көлік және логистика салаларын – жіті қадағалап, осы салаларда бірлескен немесе тікелей стратегиялық инвестициялау мүмкіндіктерін бағалауды жалғастырып келеді.
Осындай инвестициялық мүмкіндіктердің бірі — жаңартылатын энергетика саласындағы халықаралық компания Enfinity Global-мен Италиядағы күн фотоэлектрлік (PV) электр станциялары портфеліндегі 49 пайыз акцияны сатып алу туралы келісім. Жалпы қуаттылығы 402 мегаватты құрайтын бұл жобаларға Enfinity Global 51 пайыздық бақылаушы үлесін сақтай отырып, тиімді басқаруды жалғастырады және Италиядағы жаңартылатын энергия нарығындағы мықты позициясын күшейтеді.
Бұл инвестициялар жаһандық деңгейде орнықты энергетикалық ауысуға ықпал ете отырып, Қордың ұзақ мерзімді инвестор ретіндегі стратегиялық мақсаттары мен мандатына сәйкес тұрақты және болжамды табыс көзін қамтамасыз етеді. Келісім аясында Enfinity Global өз жобалық портфеліне қосымша инвестициялық серіктестер тартпақ. Бұл компанияға капитал айналымдылығын қамтамасыз етіп, Италиядағы 2,6 ГВт күн энергетикасы және 5,3 ГВт энергия сақтау жүйелері жобаларын іске асыруды жеделдетуге мүмкіндік береді. Нәтижесінде компанияның елдегі тәуелсіз электр өндіруші (IPP) ретіндегі жетекші орны одан әрі нығая түседі.
AЗЕРТАДЖ —ға пікір білдірген Мұнай зерттеулері орталығының басшысы Ильхам Шабан Қордың соңғы Италиямен келісіміне байланысты инвестициялар географиясын кеңейтіп, инвестициялық портфелін әртараптандырып жатқанын атап өтті:
«АРММҚ мұнай сатудан түсетін табыс азайған жағдайда, тұрақты әрі жаңа табыс көздеріне инвестиция салудың маңызын түсініп отыр. Бұған дейін Қор Абу-Дабиде орналасқан жаһандық баламалы инвестициялық компания — Lunate Capital басқаратын мамандандырылған инвестициялық қор арқылы ADNOC Gas Pipeline Assets LLC (AGPA) жобасына 50 миллион доллар инвестициялаған болатын. Бұл да тұрақты табыс әкелетін жоба. Екінші жағынан, АРММҚ-дың 2024 жылғы есебіне назар аударар болсақ, инвестициялық портфельден түскен жылдық табыстылық деңгейі 6,2 пайызға дейін артқанын көреміз. Мұндай инвестициялар өтімділігі төмен болғанымен, ұзақ мерзімді келешекте жоғары табыс әкелу әлеуеті зор. Сондықтан мұны инвестициялық табыстылықты арттыруға оң ықпал ететін фактор деп бағалауға болады», – деді ол.
