Алматыдағы әйгілі «Медеу» мұз айдынында ерекше мәдени шара өтті – дәстүрлі қолданбалы өнерге арналған ALAMAN QURAQ-2025 көрмесі аясында 660 дана қолдан тігілген құрақ көрпе мен “алма жастықтар” ұсынылды. Жоба бастамашысы — өнертанушы Нұргүл Абайхан. Бұл туралы ALTYNQALA.KZ ақпарат агенттігі хабарлайды.
🔴 Көрменің басты символы – қызыл жастық. Бұл – Алматының “алма астанасы” ретіндегі мәртебесіне көрсетілген құрмет. Елдің түкпір-түкпірінен келген қолөнершілер ұлттық киім киіп, әр туындыға өз тарихын тігіп әкелгендей әсер қалдырды.
🧵 Түркістан облысынан келген 100 шебер әйел ерекше рөл атқарды. Олар тек бұйымдарын ғана емес, отбасылық дәстүр мен ұрпақ сабақтастығының рухын бірге ала келген.
📌 “Аламан құрақ” жобасы – бір реттік шара емес, ұлттық өнер мен дәстүрді дәріптейтін мәдени қозғалыс. Мақсат – ата-баба мұрасын жаңғыртып, оны бүгінгі буынмен байланыстыру, ұлттық болмысымызды қайта тану. Бұл – тек рекордқа ұмтылу ғана емес, қазақ қолөнерінің құндылығын әлемге танытудың бір жолы.
Айта кетейік, бұған дейін Қазақстан бір мезетте 3 мыңнан астам домбырашының күй орындауымен Гиннестің рекордтар кітабына енген болатын.
