Үкімет отырысынан кейін өткен брифингте Премьер-министр Олжас Бектенов журналистердің бизнес тарапынан салық міндеттемелерін әділ көлемде орындауға қатысты сұрағына жауап берді. Әсіресе, ірі құрылыс компанияларының салық төлеуі туралы сөз қозғалды, деп хабарлайды ALTYNQALA.KZ ақпарат агенттігі.
Оның айтуынша, 2025 жылдың басынан бері құрылыс саласындағы компанияларға 13,8 мың салықтық хабарлама жіберіліп, жалпы сомасы 116,4 млрд теңгеге қосымша есеп ұсынылған. Оның ішінде 47,1 млрд теңге өндіріп алынды.
«Бизнес салық жүктемесін азайту үшін заң жүзінде рұқсат етілген формальды схемаларды қолданады. Біз бизнесті әділ салық төлеуге бейімдеуге тырысып жатырмыз. Келер жылдан бастап күшіне енетін жаңа Салық кодексі де осы бағытта жұмыс істейтін болады.
Біз жеңілдетілген салық режимдерінің аясын қысқартып жатырмыз: шекті көлем төмендетілді, сонымен қатар кейбір қызмет түрлері бұл тізімнен алынып тасталады.
Мысалы, құрылыс-монтаж жұмыстары неге екені белгісіз бөлшек салық режиміне кіреді. Алайда бұл — екі компания арасындағы қызмет, яғни бөлшек саудаға қатысы жоқ. Бұл – нақты әрі ұқыпты реттеуді қажет ететін мәселе. Осы бағыттағы жұмысты жалғастырамыз»,- деді Премьер-министр.
