Премьер-министр Олжас Бектенов Үкімет отырысынан кейінгі брифингте Мемлекет басшысы қойған 2029 жылға қарай экономиканы $450 млрд деңгейіне жеткізу жөніндегі тапсырма туралы пікір білдірді.
«Бұл – амбициялық, бірақ қолжетімді мақсат. Өткен жылы еліміздің жалпы ішкі өнімі $286 млрд болды. Биыл экономикалық өсім қарқынын ескере отырып, ЖІӨ-ні $300 млрд-тан асырамыз деп отырмыз. Алдағы жылдары осындай серпінді өсімді қамтамасыз ете алсақ, $450 млрд межесіне жету әбден мүмкін. Бұл үшін елде өнеркәсіптік әлеуетті арттыру, экономиканы әртараптандыру, қосылған құны жоғары өндірістерді дамыту бағытында ауқымды жұмыстар жүргізілуде. Мұндағы мақсат – қосымша құн мен валюталық табыстың ел ішінде қалуын қамтамасыз ету», — деді Премьер-министр.
Оның айтуынша, қазіргі таңда «Бәйтерек» холдингі арқылы экономиканы қолдауға қосымша 8 трлн теңгеге жуық инвестиция тартылуда. Сондай-ақ, құны 1,5 трлн теңгені құрайтын 190 өнеркәсіптік жоба іске қосылмақ.
🔧 Үкімет экономикалық өсімді ынталандыратын негізгі бағыттарды белгілеп отыр:
•Мұнай өңдеу
•Металлургияны жаңғырту
•ТКШ инфрақұрылымын жаңарту
•Электр энергетикасы
•Ауыл шаруашылығы
•Сирек жер металдарын қоса алғанда, минералды-шикізат базасын кеңейту
Сонымен қатар, жаңа бағыттарда да әлеует жоғары. Атап айтқанда:
•Мұнай-газ химиясы
•Автомобиль жасау
•Теміржол машина құрылысы
•Тыңайтқыш өндірісі және т.б.
🧱 Ұлттық инфрақұрылымдық жоспар аясында жаңа өндірістер мен агроөнеркәсіптік жобалар іске қосылып, қажетті көлік және өндірістік инфрақұрылыммен қамтамасыз етіледі.
2029 жылға дейін жаңа зауыттар іске қосылады. Олардың қатарында:
🚗 Автомобиль зауыты,
🧪 Бутадиен, аммиак пен карбамид өндірісі,
🏗 Металлургиялық кластер мен мыс балқыту зауыты,
🛢 Шымкент мұнай өңдеу зауытының қуатын кеңейту жобалары бар.
