ed3e10c7-fbfb-4e7e-adbb-6831c70b013a

Шахматтан 2025 жылғы Әлем кубогында сенсациялық нәтиже тіркелді, деп хабарлайды ALTYNQALA.KZ ақпарат агенттігі.

Алматы облысының атынан сынға түскен жас спортшы Элназ Қалиахмет әлемдік деңгейдегі мықты қарсыласын жеңіп, ел назарын өзіне аударды. Тек бір ай бұрын ғана 14 жасқа толған Элназ тәжірибелі грузин гроссмейстері Нино Бациашвилиді (рейтингі – 2462) жарыс жолынан шығарып тастады. Қазақстандық шахматшының халықаралық рейтингі – 2218.

Қос партияның қорытындысы бойынша есеп 1,5:0,5 есебімен Қалиахметтің пайдасына шешілді. Осылайша ол жарыстың үшінші кезеңіне жолдама алды. Айта кетейік, Элназ бұл додаға Қазақстанның жаңа чемпионы ретінде қатысып отыр және рейтинг бойынша 80-нөмірмен тіркелген.

Батуми қаласында өтіп жатқан сайыста тағы бір қазақстандық шахматшы – Меруерт Камалиденова да көптің үмітін үкілеп отыр. Ол алғашқы ойында ресейлік атақты шахматшы Александра Горячкинаны жеңіп, сенсация жасаған болатын. Алайда екінші партияда Горячкина есепті теңестірді. Енді матчтың тағдыры 11 шілдеде өтетін тай-брейкте шешіледі.