Қазақстандық бітімгерлер үстел теннисінен халықаралық турнирде жеңіске жетті Ұлттық контингенттер арасында үстел теннисінен жарыс Фауар базасында өтті, онда Голан биіктері ауданында қазақстандық бітімгершілік ротасы орналасқан, деп хабарлайды ALTYNQALA.KZ ақпарат агенттігі.
Жарыс барысында Қазақстанның әскери қызметшілері майор Михаил Лудвин мен сержант қуат Әшімханов түрлі елдердің мықты қарсыластарымен күресте жоғары техника мен үйлесімділік танытып, жұптық санатта бірінші орынды иеленді. – Біз осы турнирге дайындалдық, қарсыластарымыздың ойынын талдап, стратегияны пысықтадық. Шешуші фактор біздің жауынгерлік жолдастарымыздың қолдауы болды, — деп бөлісті жеңімпаздар. Қазақстандық бітімгершілік контингентінің командирі подполковник Жәнібек Нұрланов әскери қызметшілерді жеңісімен құттықтап, оларға зор денсаулық және одан әрі спорттық табыс тіледі. Турнир бітімгершілік миссиясының құрамында әртүрлі елдердің әскери қызметшілері арасындағы достық пен өзара сыйластықты бейнелейтін маңызды оқиға болды. Естеріңізге сала кетейік, Қазақстанның дербес бітімгершілік контингенті БҰҰ Күштерінің 2024 жылдан бастап бөлінуді бақылау жөніндегі миссиясына қатысады. Әскери қызметшілердің негізгі міндеті—қауіпсіздікті қамтамасыз ету, гуманитарлық жүктерді алып жүру, патрульдеу, сондай-ақ Израиль мен Сирия қарулы күштері арасындағы бөліну аймағында тұрақтылықты сақтау.
