1 шілде күні сағат 12:00-де Степногорск қаласының тұрғындары «Таза Қазақстан» республикалық бастамасы аясында өткен экологиялық акцияға белсене қатысты. Шара қаланың көрікті демалыс орындарының бірі — Махаббат аллеясында ұйымдастырылды.
Акцияның негізгі мақсаты — тұрғындардың экологиялық мәдениетін арттыру, еріктілер қозғалысын дамыту және қоғам назарын қоршаған ортаны қорғауға бағыттау. Іс-шара барысында қатысушылар өздерінің экологиялық жауапкершілігін нақты іспен дәлелдеп, аллея аумағын қоқыстан тазартып, тәртіп орнатуға атсалысты. Махаббат аллеясы — қала тұрғындары отбасымен немесе достарымен серуендейтін сүйікті орындардың бірі. Мұндай қоғамдық кеңістіктердің тазалығы мен жайлылығы қалалық ортаның жалпы деңгейіне тікелей әсер етеді.
Экологиялық акцияға Степногорск қаласы әкімінің орынбасары Жанасыл Сабырұлы қатысып, қоршаған ортаны қорғау — әр азаматтың азаматтық борышы екенін атап өтті.
– Бүгінгі шараның тәрбиелік мәні зор. Экологиялық мәдениет — тек тазалық қана емес, бұл — болашақ ұрпаққа деген қамқорлық. Жастардың осы бастамаларға белсене араласуы — қоғамның дұрыс бағытта дамып келе жатқанын көрсетеді, – деді ол.
Сонымен қатар: қоғам белсенділері, қала маслихаты және түрлі ұйым өкілдері қатысты. Осы акцияға арнайы жартылай жеңіл салмақ дәрежесіндегі қазақстандық дзюдошы- Мұратбек Қыпшақбаев қатысты. 2000-жылдар бойы Қазақстан құрамасы сапында өнер көрсетті. Афинада өткен жазғы Олимпиада ойындарының қатысушысы, Азия чемпионы, Душанбе қаласында өткен Орталық Азия ойындарының жеңімпазы, ұлттық және халықаралық деңгейдегі көптеген турнирлердің жеңімпазы қала тұрғындарымен бірге тазалық жұмыстарын жүргізді. .
Мемлекет басшысы Қасым-Жомарт Тоқаев 2024 жылғы Қазақстан халқына Жолдауында:
«Таза Қазақстан – ұлт денсаулығы мен елдің келешегі үшін маңызды бастама. Қоршаған ортаны қорғау – мемлекеттің ғана емес, әр азаматтың міндеті болуы керек», – деп атап өткен болатын.
Акция барысында тек тазалық жұмыстары ғана жүргізіліп қойған жоқ, тұрғындар көңілді ойындар ойнап, флешмобқа қатысып, көтеріңкі көңіл-күймен қайтты.
Шара соңында қатысушылар: «Тазалық әрқайсымыздан басталады!» деген ұранмен тұрғындарды табиғатты аялауға, қоғамдық орындарда мәдениетті болуға шақырды.
