Бүгін Степногорск қаласында жер қатынастары саласындағы өзекті мәселелерді талқылауға арналған көшпелі отырыс өтті. Жиынға қала прокуратурасы, облыстық және қалалық жер ресурстары жөніндегі уәкілетті органдардың өкілдері мен жер пайдаланушылар қатысты, деп хабарлайды ALTYNQALA.KZ ақпарат агенттігі.
Кездесу барысында ауыл шаруашылығы мақсатындағы жерлерді тиімді және мақсатты пайдалану қажеттігі ерекше атап өтілді. Жиында пайдаланылмай жатқан жер телімдерін мемлекет меншігіне қайтару, жерге түсетін нақты жүктемені есептеу, сондай-ақ ерікті түрде қайтарылатын учаскелерге қатысты мәселелерді жедел әрі түбегейлі шешу жолдары жан-жақты талқыланды.
Отырыста сөз алған уәкілетті органдардың өкілдері заңнамалық талаптарды түсіндіріп, жер иелеріне нақты ұсынымдар берді. Олар ауыл шаруашылығы жерлерінің бос жатуы — елдің аграрлық әлеуетіне кері әсер ететінін атап өтті.
Бұл бағыттағы жұмыстар Мемлекет басшысының тапсырмаларын орындау аясында жүзеге асырылуда және жер ресурстарын тиімді басқаруға, ауыл шаруашылығында әділ әрі ашық жер айналымын қалыптастыруға бағытталған.
Мұндай түсіндіру жұмыстары мен бірлескен іс-шаралар алдағы уақытта да жалғасатын болады. Жер — ел игілігі, оны ұтымды пайдалану – әрбір жер иесінің жауапты міндеті.
