Қажымұқан Мұңайтпасов атындағы алаңда Қазақстан халқы Ассамблеясының және Қазақстан Республикасы Конституциясының 30 жылдығына арналған вокалдық байқау өтті, деп хабарлайды ALTYNQALA.KZ ақпарат агенттігі.
Музыкалық шара еліміздің қоғамдық келісімі мен мәдени әртүрлілігін дәріптеуге бағытталған. Байқаудың ашылуында қала әкімінің орынбасары Жанасыл Сабырұлы құттықтау сөз сөйлеп, ел дамуы мен бірлігін нығайту жолындағы мәдениеттің маңызын ерекше атап өтті.
Сахна төрінде түрлі ұлт өкілдерінен құралған талантты орындаушылар өнер көрсетіп, көрерменге жүрек тербер әсем әндер тарту етті. Әндер тек музыкалық жағынан ғана емес, мазмұны жағынан да патриоттық рух пен елге деген сүйіспеншілікті бейнеледі.
Іс-шараға Көкшетау қаласынан арнайы келген қонақтар мен Степногорск қаласының мәдениет мекемелерінің өкілдері де қатысты. Олар бұл өнер додасының жоғары деңгейде ұйымдастырылғанын атап өтіп, көпұлтты қоғамдағы мәдениетаралық байланыстың маңыздылығына тоқталды.
Алаңды өнердің қуаты, шығармашылық шабыт пен елге деген мақтаныш рухы кернеді. Байқау қорытындысы бойынша үздік деп танылған өнерпаздар алғыс хаттармен және естелік сыйлықтармен марапатталды.
Мәдени іс-шаралар легі жыл соңына дейін жалғасын таппақ. Бұл — Қазақстанның ұлттар достығын, мәдени саналуандығын және Конституциялық құндылықтарын ұлықтаудың айқын көрінісі.
