Сыбайлас жемқорлық – ашық қоғамға жат, көлеңкелі құбылыс. Ол көбіне жасырын әрекет түрінде жүріп, қоғамның қауіпсіздігіне елеулі қатер төндіреді. Мұндай проблема ветеринария саласын да айналып өтпейді. Мал мен ет өнімдерінің қозғалысы, құжаттардың рәсімделуі, санитарлық талаптардың сақталуы – барлығы адалдық пен қатаң бақылауды қажет етеді. Осы ретте Степногорск қалалық мемлекеттік аумақтық инспекциясы саладағы әділетсіздікпен күресіп, ветеринарлық бақылау жүйесінде тәртіп орнату және заң бұзушылықтарды болдырмау бағытында жүйелі жұмыс жүргізіп келеді.
Мәселен, мал иелері мен кейбір кәсіпкерлер арасында ветеринарлық анықтаманы ресми тексерусіз алуға тырысатындар әлі де кездеседі. Мұндай әрекеттер заң талабына қайшы және салдары ауыр болуы мүмкін. Денсаулығы тексерілмеген малдың базарға шығарылуы немесе өзге өңірге тасымалдануы – жұқпалы аурулардың таралу қаупін арттырады. Бұл жағдай тек жануарлар емес, адам өмірі мен қоғамдық денсаулық үшін де айтарлықтай қатерге айналады.
Инспекция өкілдерінің айтуынша, кей жағдайда кәсіпкерлер тексеруден жалтарып, құжатты оңай жолмен алуға тырысады. Пара ұсынатындар да табылады. Мұндайда оны алған маман тек қызметтік міндетін бұзып қоймай, тұтастай қауымға қауіп төндіреді. Қазақстан Республикасы Қылмыстық кодексінің 366-бабына сәйкес, пара алған лауазымды тұлға қылмыстық жауапкершілікке тартылады. Ал 367-бапта пара ұсынған азаматтың да жауапкершілігі нақты көрсетілген. Яғни, заң алдындағы міндет – екі тарапқа да ортақ.
Өкінішке қарай, кейбір кәсіпкерлер санитарлық талаптарға немқұрайлы қарап, тексерушімен келісіп оң қорытынды алып жатады. Мұндай әрекет – заңбұзушылықтың өзге бір түрі. Дұрыс сақталмаған немесе талапқа сай тасымалданбаған өнім адамның денсаулығына тікелей қауіп төндіреді. Мұндай фактілерді біле тұра елемеу – қоғамға жасалған қастандықпен пара-пар.
