Бүгінде өміріміздің сан саласы цифрлы кеңістікке көшіп, күнделікті қарым-қатынасымыздан бастап, қаржылық операцияларымызға дейін интернет арқылы жүзеге асырыла бастады. Дегенмен, жаһандық желінің игілігімен қатар, қауіп-қатері де жетіп артылады. Соның бірі — интернет-алаяқтық.
Осыған байланысты Степногорск қалалық полиция басқармасының криминалдық полиция бөлімінің қызметкерлері тұрғындар арасында түсіндіру жұмыстарын күшейтті. Жуырда олар халық тығыз шоғырланған орындарда – «Универсам» сауда үйінде, 6-ықшам аудандағы «LikeMe» дүкенінде және «Сибирь» сауда орталығындағы банкомат маңында арнайы ақпараттық буклеттер таратып, халықпен тікелей тілдесті.
Полиция өкілдері шараны тек парақша таратумен шектелген жоқ. Олар әрбір азаматпен ашық әңгіме құрып, интернет алаяқтарының қандай қитұрқы әдістерге баратынын, олардың арбауына түсіп қалмаудың жолдарын мысалдармен түсіндіріп берді. Бұл әрекет – сананы сергітіп, сақтықты күшейтудің нақты қадамы.
– Буклет мазмұны өмірлік қажетті кеңестерге толы. Жалған сайттар мен фейк хабарламаларды ажырату, жеке деректерді қорғау, банк картасы мен әлеуметтік желі қауіпсіздігін сақтау – бәрі қарапайым, түсінікті тілмен жазылған. Халықтың ақпараттануы – қылмыстың алдын алудың ең пәрменді жолы. Қазірдің өзінде тұрғындар белсенді қызығушылық танытып отыр, – дейді қалалық криминалдық полиция бөлімінің мамандары.
Тұрғындар да бұл бастаманы оң қабылдады.
– Қазір бәріміз интернетке тәуелдіміз. Сауда да, қызмет те, қарым-қатынас та – барлығы онлайн. Ал алаяқтар аңдып отырады. Бір қате қадам – сан соқтыруы мүмкін. Полицияның ескертуі дер кезінде келді. Шынымды айтсам, бұрын WhatsApp-та келген сілтемелерге ойланбастан өтетін едім. Енді ойланып барып басатын болдым, – дейді қала тұрғыны, зейнеткер Ғабидолла Өтеулин.
Құқық қорғау қызметкерлері интернет-алаяқтардың айласы күн сайын түрленіп, шындықтан ажырату қиын деңгейге жеткенін ескертеді. Олар өзін банк қызметкері етіп таныстырып, не болмаса туысыңыздың атынан хабарласып, төтенше жағдайға тап болғанын айтып, ақша талап етуі мүмкін. Мұндайда ең бастысы – сабыр сақтап, ешқандай дерек бермей, ресми органдарға хабарласу қажет.
Бүгінгі бейқамдық – ертеңгі өкінішке ұласуы мүмкін. Сондықтан әр азамат цифрлы қауіпсіздік ережелерін жете меңгеріп, интернеттегі әр әрекетін ойлана отырып жасағаны жөн. Сақтық – сауаттылықтың серігі.
