Степногорск қаласында ауыл шаруашылығы саласындағы инвестициялық жобалардың жүзеге асырылу барысы зерделенді, деп хабарлайды Altynqala.kz ақпарат агенттігі
Степногорск қаласында ауыл шаруашылығы саласындағы инвестициялық жобалардың жүзеге асырылу барысы арнайы комиссия тарапынан қаралды. Жұмыс барысына қала әкімінің орынбасары Фархат Байқасов төрағалық етті. Комиссия құрамында Ақмола облысы ауыл шаруашылығы және жер қатынастары басқармасы басшысының орынбасары Ілияс Жүсіпов, сондай-ақ “Кокше” Әлеуметтік-кәсіпкерлік корпорациясы (ӘКК) инвестициялық жобалар департаментінің директоры Азамат Жамбеталин болды.
Комиссия мүшелері “ORGANICFOOD” ЖШС жүзеге асырып жатқан «Көкөніс қоймасын қайта жаңғырту және суармалы егістік алқабын ұлғайту» жобасының орындалу барысымен танысты. Аталған жоба Солтүстік Қазақстан облысының тәжірибесіне сүйене отырып қаржыландырылған. Қазіргі таңда көкөніс сақтауға арналған ғимаратты қайта жаңарту, сондай-ақ жаңа техника мен заманауи жабдықтарды орнату жұмыстары қарқынды жүргізілуде.
Жоба аясында суармалы егіншілік көлемін арттыру, ауыл шаруашылығы өнімдерін сақтау мен өңдеудің тиімділігін көтеру, сондай-ақ өңірдегі азық-түлік қауіпсіздігін қамтамасыз ету көзделіп отыр.
Комиссия мүшелері нысандағы құрылыс барысымен жан-жақты танысып, жобаның іске асу үдерісіне оң бағасын берді. Сонымен қатар, инвестициялық жобаның өңірдің агроөнеркәсіптік кешенін дамытуға қосар үлесі зор екені атап өтілді.
