Ақмола облысының Степногорск қаласында білім беру мен спорт саласындағы ірі жобалардың басталуы — өңірдің әлеуметтік-экономикалық дамуының жаңа кезеңі. Облыс әкімі Марат Ахметжановтың тікелей қолдауымен « Алтыналмас АК» акционерлік қоғамымен құны 22 миллиард теңгені құрайтын 1 000 орындық заманауи мектеп пен көпфункционалды спорт кешенінің құрылысы туралы меморандумға қол қойылуы – Мемлекет басшысы Қасым-Жомарт Тоқаевтың «Әділетті мемлекет. Біртұтас ұлт. Берекелі қоғам» атты Қазақстан халқына Жолдауындағы білім беру мен салауатты ұлт қалыптастыруға бағытталған стратегиялық міндеттердің нақты жүзеге асуының айқын дәлелі.
Президент Қасым-Жомарт Тоқаев өз Жолдауында мектеп құрылысын үкіметтік және жергілікті билік органдарының басты міндеттерінің қатарына қойды. Сонымен қатар жемқорлықпен күрестің маңыздылығын атап өтіп, одан түскен қаржыны толығымен білім беру мекемелерінің құрылысына бағыттау қажеттігін ерекше атады. Степногорскідегі бұл жоба- мемлекеттік саясат пен әлеуметтік жауапкершілігі жоғары бизнестің серіктестігінің нәтижесі, әрі Президенттің білім беру мен ұлт саулығын нығайтуға бағытталған бастамаларының өміршеңдігін көрсетеді.
Жаңа 1 000 орындық мектептің 2027 жылдың 1 қыркүйегінде пайдалануға берілуі жоспарлануда. Заманауи оқу кабинеттері, IT-орталық, спорт залы және мультимедиялық аймақтар оқушылардың сапалы білім алуына, цифрлық әлемге бейімделуіне және шығармашылық қабілеттерін дамытуына толық мүмкіндік береді. Бастауыш сыныптарға арналған жеке блоктың қарастырылуы – жас буынның ерекшеліктерін ескере отырып, оқу процесін тиімді ұйымдастыруға ықпал етеді.
Бұл – «Жайлы мектеп» ұлттық жобасының негізгі мақсаттарының бірі – оқушылар мен педагогтер үшін қауіпсіз және жайлы білім беру ортасын құру. Спорт кешенінде әмбебап зал, жүзу бассейні, жаттығу және арнайы спорт залдарының болуы – қала тұрғындарының спортпен белсенді шұғылдануына, салауатты өмір салтын ұстануына және бұқаралық спортты дамытуға зор серпін береді. Мемлекет басшысы Қасым Жомарт Тоқаевтың халыққа арнаған Жолдауында «Жастарымыз дені сау, мықты азамат болып өсуі керек. Сондықтан ұлт саулығын сақтау үшін бұқаралық спорттың маңызы айрықша» деп атап өтуі – Степногорскідегі спорт кешенінің құрылысының қаншалықты маңызды екенін айқындайды. Бұл – ұлт саулығына және жас ұрпақтың үйлесімді дамуына салынған инвестиция.
Ақмола облысының әкімі Марат Ахметжановтың жобаға қатысты пікірінде білім беру мен спорттың өңір үшін стратегиялық маңызы атап өтілген. Оның жобаны мерзімінен бұрын аяқталуына деген ынтасы – жергілікті биліктің әлеуметтік инфрақұрылымды дамытуға деген ұмтылысын көрсетеді. «Степногорск қаласында заман талабына сай үлкен спорт кешені мен мектептің құрылысы басталмақшы. Бұл бастама өңірдедегі спорттың дамып, білім сапасының артуына үлкен септігін тигізеді деп білемін. Жоспар бойынша 2027 жылы қолданысқа беріледі деп отырсыздар. Бірақ мүмкіндік болса оған дейін де тезірек аяқтауға болатын шығар. Игі іске сәттілік тілеп, алғыс айтамын», дейді Ақмола облысының әкімі Марат Ахметжанов кездесу барысында жобаға қатысты ойын жеткізіп. Степногорск қаласының әкімі Гайдар Қасеновтың «Алтыналмас АК» компаниясының әлеуметтік жауапкершілігін жоғары бағалауы – мемлекет пен бизнестің әлеуметтік маңызы бар жобаларды жүзеге асырудағы тиімді серіктестігінің үлгісі. Компанияның тек экономикалық пайда табумен шектелмей, қаланың әлеуметтік дамуына да белсенді үлес қосуы – өзге де кәсіпорындар үшін оң мысал.
Степногорск қаласы Білім бөлімінің басшысы Алтын Қабдрашитқызының қаладағы білім беру жүйесінің ағымдағы жағдайы туралы мәліметтері – жаңа мектептің салынуының қаншалықты өзекті мәселе екенін дәлелдейді. Аталған мәселеге орай пікір білдірген сала басшысы. «Қаламыз құрылғаннан бері 21 мектеп жұмыс істеп келеді. Оның 9 мектебі осы Степногорск қаласында орналасқан. Соның ішінде Ыбырай Алтынсарин атындағы мектеп ең ескісі екен. Ол 60 жылдай қызмет етіп келеді. Осы 9 мектеп қала құрылғаннан бері күрделі жөндеу көрген емес. Осы мәселені байқап, қолға алып жатқан қала әкіміне айтар алғысымыз шексіз. Жаңа мектептің құрылысы қазіргі жағдайдағы тығыздықты азайтуға үлкен септігін тигізер еді. Балалардың қосымша білім алуына да мол мүмкіндік жасалады», дейді. 60 жылдан бері күрделі жөндеу көрмеген ескі мектептердің болуы және оқушылар санының өсуі заманауи білім ошағының қа- жеттілігін тудырады. «Жайлы мектеп» ұлттық жобасының аясында салынатын мектептердің бірыңғай стандартқа сай болуы – білім беру сапасындағы теңдікті қамтамасыз етуге бағытталған маңызды қадам. Бұл жобаның нәтижесінде үш ауысымды және апатты мектептердің мәселелері шешіліп, қала мен ауыл арасындағы білім берудегі айырмашылықтар жойылады деп күтілуде.
Степногорск қаласындағы бұл ауқымды жобалар – Президент Қасым Жомарт Тоқаевтың білім беру мен салауатты ұлт қалыптастыруға бағытталған саясатының нақты көрінісі. 22 миллиард теңгелік инвестиция білім беру мен спорт инфрақұрылымын жаңартуға, оқушылар мен тұрғындар үшін қолайлы жағдай жасауға және өңірдің әлеуметтік дамуына зор үлес қосады. Бұл – Степногорск қаласының жарқын болашағына салынған сенімді қадам, әрі еліміздегі білім беру жүйесін модернизациялау мен ұлт саулығын нығайту жолындағы маңызды бастамалардың бірі. Жобалардың табысты жүзеге асуы – өзге өңірлер үшін де үлгі боларлықтай игі іс болары сөзсіз.
Гүлназ Бисен
